【有楼万事足．有片】50蚊男现真身　称无线扭曲原意：斗出位咁

《有楼万事足》有极悭“50蚊男”岑先生出场，同大家分享如何悭钱悭到尽，为悭水费到球场浴室冲凉、为节省车钱而行路返工，又叫大家找个愿意不花钱的女朋友。不过，节目出街之后，岑先生坦言效果与他想像有落差：“当初TVB揾我，就话想我讲下悭钱方法，但个节目出街就叫《有楼万事足》，就好似唔系当初𠮶样嘢咁。”对于原意被扭曲，岑生没有愤怒，只得无奈，“冇唔会后悔嘅，但都会有啲失望，因为讲唔到我个重点。”他明白电视台有时候为求收视，就会有剪接效果，但没想到同一个节目其他受访者会如此语出惊人：“访问个时得我一个，我唔知㗎嘛，之后我先发觉，原来咁坚㗎？变咗好似去咗第二个方向咁啰，即系大家好似斗出位咁。”

之后岑先生就话自己真正悭钱方法跟电视台所呈现的故事有所出入：“其实我读大学最尾两年就开始悭钱大计，𠮶8年就有1、2年同大学生活重叠，之后我好好彩去外国做嘢，所以有好多朋友都以为：‘咦？你真系断六亲呀？好癫㖞！’但我就好好彩，所做嘅工种系悭到钱，我去外国做嘅工作就系做工程师，又唔使点见客；另一方面，人生路不熟，所以冇咩朋友，但都有识到当地朋友，出去玩，就唔会灯红酒绿啰。”如是者，岑先生到外国打几年工后，回到香港做中学老师时，储钱大计已接近尾声，所以他庆幸自己年轻时能够成功储一大笔钱，成功上车。岑先生讲到所买的单位楼龄已有返咁上下，实用面积又不算大，全因为储到钱后都要谂前谂后。

岑先生早前讲到原来其他受访者系咁“爆”，亦有留意到港女Seasun讲过“有楼有高潮”的理论，他认为：“可能佢觉得会好啲，个男人又有能力provide到畀佢，可能真系会表现得好啲呢，咁唔定呢。”但讲到Seasun要求男人有楼仲要基本要求有2000呎，岑生说：“我觉得相爱系互惠啰，你要求得咁高，你自己条件方面，有阵时唔可以就咁judge个外表，如果净系靠外表去吸引对方呢，就会好快冇啰，所以内涵好重要，除非你真系好高，高到对方可以无条件咁付出畀你啰，如果正常嘅话，都系两公婆一齐努力啰。”至于Seasun早前话过，如果男方有楼但结咗婚，做二奶都不介意，岑生听完好大反应：“唔好啦，我唔啱有二奶呀，我相信佢会揾到合适嘅对象嘅，佢外表条件都唔差嘅，但not my cup of tea，唔系佢差，系我高攀唔起；同埋性格要一样。”岑生仲澄清与Seasun的理念完全不同。