星期日档案｜追星成心灵寄托 姨姨粉认真程度不输少女粉丝
近年因为一班年轻偶像的崛起，令到香港再次鼓起一股追星热潮，在大大小小的活动总是见到一大班年轻粉丝去到边追到边，不再追星文化已不再是KPOP偶像的专利。其实早在九十年代，香港追星文化已经相当普及，当年的少女粉丝亦已经成为姨姨，但她们对偶像的爱绝对不比现时的年轻人少，追星更成为乏味的人生中的心灵寄托，借此重拾当年的少女情怀。昨晚（8日）播出的《星期日档案》就访问了两位“姨姨粉”，讲解她们追星的故事。
现年四十多岁的Sandy由13岁开始喜欢“四大天王”时期的黎明，就算到现时已经结婚生子，甚至乎见到年轻新偶像的崛起，她对Leon的爱依然不减：“我对佢从来冇变过，开头钟意佢直到而家钟意佢，我都系觉得自己系少女嚟㗎㖞望住佢！我唔会话自己脱节，我只系会睇我自己有兴趣嘅嘢，我唔会脱咗Leon嘅节嘛，例如佢新出嘅所有嘢我都会知㗎！”
Sandy家中全都是多年来收集的黎明珍藏品，例如黑胶碟、唱片CD、演唱会纪念品、海报及新闻剪报等等，她甚至将一张1991年黎明在夜总会登台时的一场“净饮券”好好保存：“1991年嘅时候，280蚊！𠮶阵时我得十几岁咋，中学嘅时候食个饭都系10蚊、11蚊㗎咋！”
她坦言虽然结婚生仔后令追星热情一度冷却，但现时仔大女大终于再能够重拾自己的追星情怀，甚至与几个志同道合的黎明粉丝齐齐用新的方式为偶像应援，例如开直播、制作纪念品，甚至想开一个黎明珍藏馆：“我谂我人生都未试过，偶像令我哋做咗好多未做过嘅事，我哋又冇开过live，又唔系KOL，都系Leon令我哋成长咗。出面好多明星歌手嘅应援小组做好多嘢，因为我哋以前冇，都会向佢哋学习。”
Sandy感谢黎明多年来为一班粉丝带来美好的回忆：“其实佢（Leon）一路以来都系走得好前同创新嘅歌手，佢好似一个大哥哥（令我哋）跟住佢变好，尖叫声冇随住我哋嘅成长而减少，我觉得呢个系互相陪伴，佢为我哋带来好多开心美好嘅回忆。”她们又认为，就算自己年轻不再，当年少女般的心依然不变：“唔会觉得自己冇气力去追星，我谂我到人生最后一日都会去追佢！”
除了从少女时代开始追星成为“姨姨粉”的粉丝，亦有成为姨姨后才追星的“姨姨粉”。现年50多岁、现为家庭主妇的Bobo，虽然追星年资只得三年，但疯狂程度却不比年轻女粉丝低，甚至不惜为了追星而找兼职赚取每个月几千元的收入：“追星都要食饭搭车，都要一般嘅支出，同埋都有一个动力畀我唔使净系留喺屋企做家庭主妇咁闷，除咗落街买𩠌，朋友约我出街我都冇兴趣唔想出街！”
Bobo于几年前在街头见到Judas罗凯铃的演出而成为其粉丝，她坦言Judas的歌声能令她勾起八、九十年代的回忆而产生共鸣：“有时会回想番自己年轻嘅时候，会喺脑海回忆好多画面，因为有小朋友、有家庭，所以都冇去特别做呢样嘢（追星）。”现时小朋友已经长大，不需要Bobo的贴身照顾，所以亦多了很多私人时间去做自己喜欢做的事，甚至因为追星而增值自己：“我本来开IG系为咗睇阿囡分享嘅嘢，但之后识咗追星之后就将IG改做追星帐户，仲因为佢开始学剪片、学影相、学print相，自己不断有啲进步。”
除此之外，Bobo更与一班的同道合的“姨姨粉”一起夹钱租舖位摆放自己制作的应援物，甚至花十多万元在多区闹市租用一星期电视萤幕墙播放Judas的生日应援影片，尽显姨姨们财力十足的一面。
Bobo的老公亦为了支持太太，由日更改为夜更方便两公婆一同追星，两人感情亦因此变得愈来愈好：“网上啲人话，追星令到‘婚姻破裂’，我都唔知真定假，我留喺屋企又唔知做咩好，我咪同佢一齐去啰，听下听下都觉得ok㖞好听㖞，咪追埋一齐啰！”两人更透过追星重拾拍拖乐趣：“平时各有各忙，都系倾下屋企琐碎事冇咩共同话题，我哋而家成日放假行番Judas busking嘅地方、一齐打卡倾偈，可以怀念番我哋以前未结婚，拍紧拖嘅时候嘅回忆。”