徐㴓乔Asha拍格仔Mike新综艺　晒比坚尼撼Double S：制作组哇哇声

徐㴓乔（Asha）今年凭电视剧《大叔的爱》一炮而红，周二（19日）单拖出席坚离地城卑路乍湾海滨长廊一周年活动，直认工作接踵而来：“拍完《大叔》之后忙到傻咗，时间过得好充实，少咗好多瞓觉时间，不过收入都系有史以来最开心嘅一次，要好好计划下财政。（会点样使？）储起佢，同埋两年冇见过屋企人，希望见到佢哋之后可以请佢哋食餐好，又可以喺酒店住几晚。”

Asha近日正孖陈汉娜（Hanna）及P1X3L成员Marco（叶振弘）忙于拍摄由“无制限OT编集团”打骰的冒险型综艺节目《香港秘密搜查官》，Asha透露：“Casting佢哋主要想知我哋嘅弱点同底线，我当然话乜都玩得、乜都唔惊。”她又雀跃表示：“揾UFO、又有灵异类，好玩、好癫、好期待出街，因为我哋拍紧嘅嘢应该香港电视史上冇人做过，原来身边有好多秘闻系我哋冇发现！”Asha直言挑战冒险底线，自己不懂游泳、已达至揾命搏程度：“上山下海已经系小事，仲有啲好惊吓嘅画面！”不过Asha指为保持神秘感，现阶段不能剧透太多。

谈起“无制限OT编集团”前作《ERROR自肥企画》及《美女郊游游》等掀起全城热烈讨论、回响不俗，至于《香港秘密搜查官》能否超越，Asha就指：“好难对比因为件事完全唔同，我哋又唔系《美女郊游游》，出街大家见到嘅画面应该狼狈到一个点，公司希望我哋Keep到靓女样畀大家睇，但真系尽咗力！”至于预告片段已经出现性感比坚尼画面，Asha更大晒长腿，不过她就谦虚指：“我着比坚尼冇咩睇啦，好感激制作组见到都哇哇声，即使唔觉得我哋特别正，都好畀面、畀啲声我哋听，希望唔会吓走观众。”

点击下图观看Asha精选靓相：