陈凯琳首次孖细佬出活动成焦点　龙凤胎激似样：中间有阶段冇咁似

艺人陈凯琳（Grace）跟孖生细佬Derek于周四（2日）出席内衣品牌活动，今次是两姊弟第一次一齐出活动，不习惯幕前工作的Derek在台上表示有点紧张。不过有家姐“傍住”，相信应该会放松一点。讲起Derek首次出席活动，Grace在接受《香港01》访问时表示细佬有紧张，但也好兴奋。被问到会否跟Derek再以“姊弟档”出活动，她说：“都未必嘅，因为佢都有份正职，但系我觉得难得有呢个机会畀佢尝试吓。”

Grace同Derek感情好好，Grace说：“始终我哋系龙凤胎，我哋入幼稚园又一齐，中学又系，成长嘅时候有个伴永远都，所以感情系好好，同埋可能系一男一女，我哋倾偈嘅时候都会有好多唔同嘅嘢可以分享畀大家。”他们两个是龙凤胎，所以好似样，被问到是否由细到大都似样，Grace笑说：“我都当然希望我哋似样嘅，始终我哋都系twins，我谂细个好bb嘅时候最似，咁中间都有段阶段冇咁似，而家又好似大大吓又差唔多咁㖞！”

Grace不时会在IG分享两个宝贝仔的生活点滴，近日细仔郑承亮（Yannick）就被网民指愈来愈似Grace爸爸，即是公公，Grace听到都好雀跃，好笑说：“系啊！白雪雪啊嘛，我初初都冇觉得咁似，但我咁样对比，我就觉得好似，因为细仔系𠮶啲（皮肤）白里透红𠮶啲嚟，同埋佢系晒极都唔会黑，所以佢好似一只绵羊仔、公仔咁，白雪雪，咁公公都系呢类型嚟，又系眼超级圆碌碌，我同公公讲嘅时候佢就好开心啰。（佢听到好开心？）开心啊，相信每一个人都希望个孙或者小朋友都似返自己嘅。”