【八时入席】时生杨瑞麟唔襟捞　失做金牌司仪机会：我冇咩企图心

54岁杨瑞麟在《八时入席》饰演电视台总裁时生，剧中长䄂善舞，机关算尽，但现实中的他刚好相反，连一个高层都不认识，亦曾试过有上位机会不懂把握，25岁的杨瑞麟在1987年参加《全能司仪大赛》之后入行，坐稳一线司仪之列，当时何守信离巢、又发生钟保罗事件，无线想推杨瑞麟做金牌司仪，事隔多年，杨瑞麟亦承认真有其事，他说:“当时有传闻金牌司仪要揾接班人，确实有高层揾过我去倾，当时我做紧《香港早晨》三日同《欢乐今宵》一晚，佢哋就叫我《香港早晨》照做，《欢乐今宵》就加到三晚，如果有大骚又要照做，点解当时话我好似推公司呢？因为佢叫我加长少少约，但我出面又有其他工作，咁啱又应承咗人，我又唔想做唔到承诺，我唔记得咗，当时点讲，大约系我话谂谂先啦，份约系咪可以唔加长呀?人工系咪可以调整好啲？应该系呢个部份有啲达唔到共识。”

杨瑞麟续表示：“如果当时公司唔同我倾任何嘢，就咁安排工作俾我，听日返多晚，做多日啦，我做咗㗎喇，我从来都系有工作俾我就做，冇就唔会话搲，突然叫我上去倾，我就唔系好识点做，好记得上完去倾，隔咗大约两星期左右，公司打俾我，叫我照做住《香港早晨》先啦，我当时答好呀，唔该，对话就咁完结，亦结束咗之前所讲嘅嘢喇，事后我同一位好熟嘅幕后同事倾，佢话你失咗个好大好大嘅机会，亦有人话我咁嘅性格死得啦，但呢个系事实，我系冇咩企图心，我性格系咁，望返转头，工作机会系损失，但我生活都几好呀？当时因为我出面有其他生意，我物质追求唔大，我冇后悔，不过人生有时就系做错好多决定，但又谂返，当日你做啱决定又系咪一定红呢？”

《八时入席》后，其实时生亦忙拍《同盟》，现播放中的《巾帼3》他亦饰演恶人，和而前只演专业人仕角色，非常不同。事业又再上升，不过杨瑞麟亦是平常心，他说:“我地都系等公司安排，就算只做专业人仕，都希望角色可以丰富啲，我谂边个演员都想，但呢样嘢演员系控制唔到。”