【八时入席】时生杨瑞麟为信仰拒做风水骚 惨变老临：肯定冇后悔
《爱．回家之八时入席》到下年1月6日就全剧播完，邦主(黎耀祥饰)、十仔(马贯东饰)、Elsa(简淑儿饰)等，令人难忘，但最有惊喜的，估你唔到一定系时生(杨瑞麟饰)，在剧中是电视台总裁相当滑头，机关算尽，最近剧情还说他为了电视台不卖盘，而自动降职到物资供应部主管，但想不到现实中的时生杨瑞麟亦曾被无线降职，由金牌司仪变为临时演员，93年杨瑞麟开始任《都市闲情》主持，原本年年爆骚，但在97年因基督徒身份婉拒主持风水节目，结果被停职，之后更要当闲角还骚，杨瑞麟自言性格影响命运，他说:“下年我会攞30年金牌，我个人企图心唔系咁重，物质生活对我嚟讲够就得，望返转头，我好肯定话你听我冇后悔。”
【八时入席】时生杨瑞麟为信仰拒做风水骚 惨变老临：肯定冇后悔
杨瑞麟和无线的关系，分分钟精彩过《八时入席》， 1987年当时25岁的杨瑞麟在加拿大多伦多大学读完土木工程回来，在一间工厂当Project Manager，当年杨太看到无线举办《全能司仪大赛》帮他报名，黄子华也参加这个比赛，最后杨瑞麟成为冠军，结果杨瑞麟起步不错。
93年开始主持《都市闲情》，基本上年年爆骚，直至97年杨瑞麟因为是虔诚基督徒，拒绝主持风水环节，结果他不获续约，连司仪工作亦即时停止，最惨是要还骚给公司，他说：“当时有人觉得如果有啲同事，个个唔钟意做就唔做，咁公司咪好难运作？但我哋主持嚟讲，其实好易搅掂，譬如有人怕狗，咁咪同个唔惊嘅调啰，好易就解决到，我系基督徒，我唔想接触风水，而且风水节目最多做两日？两日都多，一星期一日就够，咁系咪好难调呢？但当时的确闹出一啲事件，我系被抽起咗，冇得再做《都市闲情》主持。发生呢件事前，我亦同过公司讲，唔想拍剧，因为自己出面有工作又有主持，冇乜时间，公司同我讲如果唔够骚，你要还骚俾公司！我仲不以为意，我哋做司仪点会唔够骚？但之后停咗我主持工作，讲笑咁话，我可能系第一个还骚嘅艺人。”
因为要还骚，杨瑞麟要在剧组拍剧，几乎全部茄哩啡角色，他说：“当时久唔久就收到剧集组一个电话，做啲俾临时演员好少少嘅角色，我亦唔介意，我仲好奇怪，我完咗约㖞，仲有人打嚟？原来under骚合约就自动更新，结果还骚还咗两年。”由爆骚主持变成还骚茄哩啡，杨瑞麟因为在外有生意，所以失落感并不大，他说：“因为出面有其他工作，所以就…当然有唔开心，但系好快就冇难受感觉，但还完骚无线再签返我，我都好奇怪，因为喺佢哋眼中我可能系几唔听话嘅人，但又真系签咗！”
下年入行29年，杨瑞麟先等到“时生”这个入屋角色，但到现在杨瑞麟都不明白为何突然有这个机会，有人觉得时生是他的事业另一高峰，但他没有这种想法，他说：“30年来，唔觉得自己有“高”过。和无线的关系平而未稳，可能我一直都系静静的工作，唔活跃人际关系，对管理层又唔熟，偶然撞到亦只系礼貌式打个招呼，所以只可话系关系平静而不敢讲安稳。对于好多人嚟讲等咗30年先有机会系迟，但我好接受每一个人有不同嘅人生，有人可能一生都冇一个机会，亦有啲人好早有一个机会，视乎你同边个比较，我觉得自己有呢个机会，应该要好感恩。”
同样做了接近30年的麦包和陈国邦，最近选择离开，杨瑞麟称在无线要清楚自己的代价和选择，他说：每个人选择都有代价，有啲坚持，之后成功，有啲坚持去到尾都冇呢个机会，要因应自己嘅经济状况嚟调教心态。如果你屋企有好大负担，咁你可能要迫住转行，唔系个个坚持就得，好似我咁就系一个例子，坚持到现在都唔系有咩机会，我自己表现亦系一般啦，所以只可能喺工作上自己揾乐趣。所以就算新人问我，我都系叫佢做好自己先，唔好太多空想。”《八时入席》和《巾帼3》杨瑞麟亦有不少戏分，但他亦明白不保证套套都有戏做，亦有可能做回普通角色，他说:“怕？唔怕啦，我只系希望有多啲角色，冇，都接受现实啦，做返以前嘅角色，我可以话唔享受啦。但都会做好。”呢啲就系专业啰！