专访｜萧正楠在学时拍拖被班主任拆散：佢话我会教坏个女仔

萧正楠与黄翠如因在2014年一起拍摄《师奶MADAM》而相恋，拍拖4年后就于2018年结婚，不过他拍拖初期，其实不被外界睇好，曾有人形容萧正楠是花花公子，与黄翠如不登对。萧正楠在《香港01》专访中说道：“我呢个人就系成日撞到呢啲事。”

服装：Theory

学生哥恋爱被班主任拆散

萧正楠回忆道，中学时期拍拖时，也曾经遇到类似的事：“通常都系好好成绩嘅女仔钟意我，even班主任都会同佢讲：‘唔好同佢一齐啦，教坏你㗎，搞到你成续唔好㗎。’我成绩又唔系好差嘅，中上左右。去到最尾就系佢想考好啲，因为有一次考得唔好，佢想考好啲，佢唔想挂住感情嘢就唔读书。𠮶阵时佢就话不如：‘我哋读书先啦。’后尾佢仲好似去埋外国读书，咁就冇咗。”

幻想自己是漫画主角

读书时期喜欢哪一种女仔？他就以一本日本漫画《橙路》为例，说：“读书嘅时候有本漫画叫《橙路》，唔知你有冇睇过，好正㗎。你永远都系幻想你系一个有钱有能力嘅男仔，学校两个校花非常钟意你，一个就系超级成熟、elegant、靓嘅，一个就系阳光活泼开心，我永远都系幻想呢样嘢，但系幻想㗎啫，冇可能发生，当然你希望自己遇到一个mix埋一齐嘅。”

黄翠如并不是理想对象

萧正楠坦言说，其实黄翠如并不算是幻想中的“理想对象”，但却是他爱的人。他说：“佢呀？佢畀咗我新嘅冲击啰，唔系我想揾𠮶类型嘅女仔。其实大家初初拍戏都冇𠮶个感觉，系临拍剧之前呢个女仔几好㖞，网友好钟意吖，好有性格又挨得苦，但系我都冇一个感觉（想）同佢喺埋一齐，系真正同佢一齐工作嘅时候，见到佢每一个待人处事嘅时候，有时啲人俾导演闹完，佢会有同情心去安慰吓佢。我觉得系欣赏，已经超脱咗自己幻想出嚟嘅人，Ele唔elegant又有乜所谓？当你钟意一个人嘅特质，你以前幻想嘅嘢其实通通都唔紧要，所以呢个世界冇《橙路》，只要你揾到你钟意嘅一点，你就已经钟意咗佢。”

黄翠如也有温柔一面

黄翠如每论在镜头前后，也予人一种“男仔头”的感觉，但其实也她也有温柔、小鸟依人的一面。当然，这一面就只有与她最亲近的人才有幸看到。萧正楠：“可能系肚饿嘅时候，或者有求于我嘅时候咪女仔啲啰。”他表示，老婆黄翠如就只会煮一些如焗面包或麦皮、公仔面等一类简单菜式，所以当她想食一些“好少少”的菜式时，就会向老公萧正楠要求。萧正楠回忆起当时的情景时，就甜笑着说：“梗系会高音返啲啦，会嗲啲嘅，但系好少好少时候，好难得嘅，就好似熊猫交配一样，好难得，哈哈哈哈哈。”

习惯在家煮饭：我哋觉得唔自在

为什么不外出食饭？原来是因为他们介意别人的眼光。他说：“唔关人哋事，系我哋觉得唔自在，人哋见到会望吓或者影吓相先。因为你喺出面都系做紧一个艺人身份，但系返到屋企先系真真正正最free嘅时候，所以我哋出埠就会出去食嘢，因为冇人认识你，你想点都得。”俗语话：“要留住一个男人，先要留住佢个胃。”但套在萧正楠和黄翠如身上，就正正是相反。

原计划于过山车上求婚

说罢，他就回忆起当年和黄翠如在英国旅游的日子，一起去玩过山车，坐摩天轮，行市集，离奇地去了一个中餐馆食饭，而又遇到一位认识他们的中餐馆老板。他还说，其实当时去的城市，黑刺，就是当年向黄翠如求婚的地方。

他说：“见到屋企张相就会谂返起𠮶日，玩过山车嘅时候，我想攞只戒指求婚，但系佢好惊唔敢望，所以当时我又收返埋。我有谂住叫佢望一眼，但系佢唔够胆望。我知佢心脏有啲事，其事佢唔应该玩㗎，但系佢想陪我，上过山车就系想求婚，结果我就收返埋。（注：求婚的时候他们正在玩过山车）佢仲问我：‘点解你玩完过山车之后，个心情仲down咗啲？’我心谂，plan咗咁耐就系想做一件事，我梗系down啦，结果咪揾下次机会啰。最后尾我哋去到一间好靓嘅教堂，𠮶度好真系好靓，有种好宁静，又人唱吓圣诗，好圣洁，所以我就喺𠮶下求婚。”萧正楠一边讲一边甜笑，真是十分甜蜜。