破地狱｜许冠文凭电影看破尘世 明白做人活著的意义:欣赏沿途风景

香港恒生大学昨日（3/6）举行第五届荣誉博士学位颁授典礼，许冠文获颁授荣誉博士学位。提到孙仔孙女对电影有否感兴趣？许冠文表示：“冇，唔知点解暂时冇，唔知系咪暂时喺我面前唔肯讲呢，佢哋冇话过想做电影，其实佢哋想做律师同医生但好难讲，人就好似三文鱼咁，你硬颈都冇用，整整吓潜意识就会带返去你𠮶度，就好似三文鱼永远都会游返去河上面𠮶度，真系唔知点解，死都要去返𠮶度。”

讲到人生最灿烂嘅时刻，许冠文有感而发，停下数秒整顿一下心情才发表，他说：“我觉得最灿烂就系而家，因为我睇通咗啲嘢，尤其是《破地狱》嚟讲，人生追求嘅意义系乜嘢呢？我成日都讲过好多次，你又唔知喺边度嚟，嚟呢度做乜嘢？尤其是死咗之后又唔知去边，三样嘢都唔知，做人会点快乐，仲有日日返工做乜嘢，成日谂咁人生嘅意义系乜嘢呢？但当我睇咗呢套电影嘅剧本之后，发觉编剧好好犀利，佢哋只系得40几岁，竟然可以编呢啲嘢出嚟，答咗我嘅问题，原来生命最重唔系个意义嚟，生命最紧要就系得一次，你还掂上咗车，你最后都会落车，因为有一样嘢就系你肯定会死，咁个意义就系欣赏沿途嘅风景啰。当你做得一日人，就欣赏一日嘅沿途风景，最好享受到尽先劲，同埋欣赏埋旁边嘅人，你试下回忆一生，你珍惜或真系同你一齐嘅有几多？好命嘅十个八个，或者都未必够，所以我觉得最紧要欣赏旁边同你一齐嘅人，甚至远大啲连你嘅敌人都欣赏埋，其实有咩敌人啫？除非好离谱，我觉得难得一齐啰，原谅佢就原谅佢，或者欣赏埋佢，因为生命好短暂，沿途风景亦好短暂，无论好人或者敌人都系𠮶一转车，咁呢个系我拍《破地狱》获得好大嘅收获。”