许冠文获颁授荣誉博士学位 指观众愿意入场支持高质素香港电影

香港恒生大学今日（3/6）举行第五届荣誉博士学位颁授典礼，许冠文获颁授荣誉博士学位。许冠文接受《香港01》访问时表示：“今日好高兴，可以带埋孙仔孙女嚟见证呢个时刻，最难得系佢哋出年就读大学，顺便参观呢间大学。而我都有同佢哋讲迟早佢哋都可以攞到博士。”

对于能够有今天的成就，许冠文表示从来都没想过：“我初初读社会学，从来冇谂过后来喺电影帮助我咁多，大家可能睇我嘅作品都系好地道，好大众化，但其实我读社会学嘅时候已经潜移默化，已经系跟住大路走。同埋我知道电影系好影响人，尤其系我。变咗后期我觉得电影系有社会责任，唔单止娱乐咁简单，系真系会有影响，以前我唔系好信，渐渐觉得电影系会影响一切，因为我哋由细睇到大。”

而许冠文更对香港电影有信心，表示香港人仍然愿意入场支持高质素香港电影，他说：“电影而家系好好环境，因为今年系有两部片票房过亿，即系观众话畀你听，我哋唔系完全唔睇，我哋系已经揸住钱喇，等紧“你”有料嚟㗎啫，啱睇就“冚唪唥”过亿嘅，咁如果普通嘅呢？咁就唔该你喇，我哋而家就系一系唔食，一系就要食餐好嘅，唔该你煮餐好嘅咁解，我个梦就系点样“煮”餐好畀香港人食，都唔剩止，希望全世界都睇到香港嘅电影啦，咁先系最紧要。”