中佬唔易做｜张松枝唔谂退休最想活在当下：可能我听日就唔喺度！

人到中年竞争力大大减低，想要离开comfort zone转个新环境未必有想像般容易。现年51岁的张松枝早前在ViuTV真人骚《中佬唔易做》中挑战为期三日的转行生活，化身做NowTV的街头宽频推销员，却竟然发掘了自己演戏以外的新技能？

摄影、短片：叶志明

剪接：萧泳淇

做演员口才更好：做兼职都愿意！

虽然是拍节目，但张松枝亦没有任何特权，要体验做推销员就张松枝需先经过见工、上堂和考试的阶段，全部合格才有资格真正站在街头开始推销：“初时预期会有很大困难，天气又热又要戴住口罩，人哋又认唔到我，咪更加骚唔到靓仔样做唔到生意？于是我就出啲诡计，做咗一个大名牌挂喺胸口，写住‘张松枝’三个字！咁睇唔到我个样，都睇到我个名吖！有时我仲扮下嘢，饮下水抹下汗，就拉低个口罩，睇下啲人认唔认到我！”他笑言作为演员背惯剧本，演戏多年亦训练出好的口才能力，因此要背熟资料和在街上推销都难不倒自己：“所以呢份工系为我度身订造，我几钟意！如果可以嘅话，之后请我做兼职我都愿意！”

幕前做得耐　想挑战幕后创作拍短片

不少艺人都有开展副业，例如开餐厅、饮品店、甚至乎自创时装品牌等等，张松枝又有没有想开副业的想法？他笑言：“好庆幸之前冇咁嘅谂法，你知啦，依家好多人开舖头都咗出事，哈哈！其实我做幕前做得耐，想参与多啲幕后创作嘅嘢，我有几个朋友依家夹埋开始创作紧啲嘢，可以畀多啲新嘢自己冲击一下，例如短片、剧集等等都谂紧。”他认为创作不应一味模仿，最紧要够贴地、够创新：“我想同啲后生仔谂啲新嘢出嚟，因为时代唔同咗，一啲黑色疯狂啲嘅嘢，唔系紧贴依家，系要紧贴未来嘅嘢，例如依家发生紧嘅嘢，未来会系点呢？”

想拍育儿真人骚

张松枝入行超过25年从未参与过真人骚，他坦言如果还有机会拍下一辑《中佬唔易做》，想试下去日本导游，更表示一定会为了拍好节目努力学好日文。他笑言自己亦很想尝试拍照顾小朋友的节目：“凑一个BB嘅节目应该几好玩，因为我自细已经照顾BB，经验好丰富。我细个住屋邨，我阿妈啲朋友要揾保姆，结果我阿妈就畀咗我哋凑，𠮶时已经开始经常凑小朋友，所以到而家都仲有啲亲戚交低BB畀咗我凑！”超级爱小朋友的松枝表示，之前曾帮手照顾一个BB，直到现时已经4岁大仍然经常见面：“佢唔跟人净系跟我，仲一定要一个礼拜同我视像倾偈，我有时仲会接佢出去玩，有种好密切嘅感觉！”家有一个11岁儿子的松枝称，虽然自己很喜欢BB，不过没有计划再生多一个：“唔会喇，依家喺中佬，再生唔掂喇！佢读完大学我都差唔多喇，我养唔起！”

11岁仔仔超醒目　松枝唔担心

松枝坦言觉得仔仔非常醒目，所以自己不太担心他的将来：“如果佢大个想去外国（读书）咪去啰，但系唔系想去就去，要畀啲成绩我睇，我觉得值得去就会想办法畀你去，不过要睇下我有冇钱先。（有没有帮仔仔准备一份教育基金？）我有买份教育保险，去到某个年纪就可以支持佢去外国读书。”

人到中年骨头卜卜脆　想揾欧锦棠教打拳？

作为一个中佬，张松枝表示人到中年有不少新目标，希望能好好增值自己：“我好想学功夫，或者关于拳击嘅嘢，我觉得自己嘅身手退步咗好多，好想揾个师傅再锻炼一下！以前都起码都打到个空翻、翻筋斗，依家啲骨卜卜脆，拗亲腰就唔得掂！（揾欧锦棠教？）呢啲大师傅，唔好搞啦师傅，哈哈！”他坦言以前拍古装剧有不少动作场面，尤其一双脚经常都满布伤痕：“老嘅时候有风湿唔知点算，不过我都有定期去做body check！”

今日不知明日事　活在当下最重要

至于何时计划退休，张松枝坦言自己不是一个擅于做周详计划的人，及时行乐才是最紧要：“有得做就做，定死太多嘢，好多嘢你做唔到喇，如果计埋二、三十年后，可能我听日就唔喺度呢！（即系你都系一个活在当下嘅人？）系，当我个仔大个咗我更加唔驶担心添！仲唔需要谂！你到时想做咩就做咩啦！”他笑言人随住年纪的增长可能反而有另一个突破：“可能我去到70岁会有另一个高峰，我可能做到唔系叔叔，做公公，可能仲攞到金像奖！所以我冇限死自己要几时退休，我希望系做到我唔想做为止。”

点击观看更多张松枝在《中佬唔易做》的拍摄花絮：

点击观看更多张松枝的访问照片：