【一日四剧】无线御用阿妈程可为耻笑颁奖礼：畀嚿胶我做咩？

电视精一定发现，最近在无线“老是常出现”的、曝光率最劲的不是一众小生花旦，而是65岁的超级甘草程可为（Rainbow）。最近她一日4剧连环播，由朝早开始播的《楼奴》（11:45am）、下午《宫心计》（2:45pm）、黄金时间的《巨轮II》（8:30pm）及深夜的《创世纪》（11:50pm），当中有3套剧饰演妈妈角色。

40年拍逾100套剧　最恨拍广告

翻查资料，Rainbow姐这位无线御用阿妈，为1972年无线第一期训练班学生，同期有甘国亮、许绍雄等，在无线前后服务接近30年，拍过111套剧，这位殿堂级绿叶，原来最想要的不是奖座，而是一个广告，她说：“我冇留意自己出得咁密㖞！做咗40几年，咩类型嘅阿妈都做过，应该妈妈形象深入民心啦？但就半个关于妈妈广告都冇人揾，呢啲真系整定，希望退休前有啦，依家嘅心态，有就做，冇就唔好死埋去搲，人哋都冇预你，你走埋去咪盏乞人憎。做咗咁多年，程可为三个字，观众都知我系乜水啦，唔通仲想攞视后咩？唔好咁癫啦，攞嚟做咩？一嚿胶，终身成就奖？更加唔好，畀旧胶我，睇见都好笑，求其一个三角型嘅胶，就开心到眼泪都出理？有冇搅错呀？”

专业阿妈未结婚：我唔可以有家庭负担

程可为多饰演人母，但现实中她未婚、亦没有子女，但她不觉得人生有什么欠缺，她说：“冇，绝对冇，因为我唔可以有家庭负担，唔可以有人我要忧虑，我当自己只狗系人咁养，我会挂住佢，又惊佢冻或者热、会唔会肚饿又点，如果有家庭就更加多嘢担忧，我会搅唔掂㗎，我会好大压力。我而家好轻松，钟意𣉤几耐就几耐，老啲自己会唔会老人痴呆，我就唔理喇，我唔会后悔，点解后生时有人追，而唔去结婚，我唔会觉得冇老公，冇儿女会唔舒服㗎，夜晚寂寞？更加唔会，我好多节目㗎！”

1996年，程可为由温哥华回流后多做妈妈角色，但年轻时都是力捧花旦之一，稳坐女二角色，当时一线女艺员为汪明荃、赵雅芝等，程可为未试过上一线，但她觉得没所谓，她说：“𠮶阵都叫做第二㗎喇，女仔嚟计，唔算妹丁，或者企埋一二边𠮶啲啰，又唔会眼红人点解自己无得担正，我好后生已冇呢个心喇，唔知点解，我都解释唔到，好多人觉得我好强争胜心，其实我唔系啰，可能个性生出嚟系咁。”

唔热血 ≠ Hea做　“推剧？等发霉咩？”

和其他绿叶不同，程可为就像每间公司都有的老臣子，不会对公司要求太多，看落有点对工作没有热情，她说：“热血？由细到老都冇热血，但冇系咪等于hea做？绝对冇，我从来冇推过job，有时第一期训练班同学聚会，佢哋都笑我，搅错呀，咁少戏份妳都接？但我又无乜所谓㖞。唔接，咁留喺无线做乜鬼？等发霉咩？因为钟意做戏所以咩都做，其实任何角色，你有心去做，都可以发挥。”

至于经常做妈妈角色，原来程可为没有太大感觉，她说:“讲真，喺无线做得太多阿妈角色，但冇一个令我觉得好刻骨铭心，尤其时装剧饰演𠮶啲妈咪角色，无乜戏可以发挥，反而最记得《宫心计》，呢套唔系做人阿妈，但特别有场戏，我记得系第一日开工㗎，剧情讲我俾人踢出宫又无任何倚靠，对我嚟讲好有发挥，自己都好开心。”

炒楼赚1,500万：“千祈唔好话我有钱”

不少现职或离职的无线艺员，都数过无线不是，但程可为反而有另一种看法，她说：“老实讲，做老板就一定唔愿意出多啲钱畀伙记，做伙记又梗系想做少啲但出多啲钱，好正常㖞！我就觉得你唔做呢份工，做其他，我谂都系一样咁复杂㗎喇！𠮶阵自己后生，公司有畀机会我，移民回流返嚟，呢十几年都拍咗好多剧，咁我仲想点呢? 我又唔会追多啲人工，佢话骚钱加100蚊，我都系话咁好啦。其实加你100蚊已经好畀面你，系咁㗎啦！跟官咁耐唔知官姓乜咩？点都唔会加你一千蚊，你又驶咩咁紧张？你唔开心人哋都唔会加俾你㗎啦，大家都心照啦，有时佢哋叫我签约，我叫佢打好，我就上嚟签个名。我问都唔问，唔好期望太多，咁就唔失望。如果你觉得加100蚊系侮辱，你应该拧转头就行，讲咁多无谓嘢做咩？”

程可为没有斗心、可能跟她善于理财有关，程可为更可谓楼市高手，多年来在楼市账面超过1,500万斩获，但程可为说：“现在住紧层楼系买嘅，但千祈唔好话我有钱，税局会追㗎！”她续说：“喺无线做嘢，满足唔系钱银，而系有得表演，令我觉得好爽好过瘾，但又唔好畀太多我，我有压力㗎！随和啲去演绎，用心做戏，好与坏观众自然识分。有时去街市买嘢，啲人都会问我做咩啲新剧咁少见妳，咁你咪知你个人得唔得到肯定啰。”