《仍坚持》的士佬入行37年主角变绿叶 邵卓尧：只欠一个机会！
郑世豪新歌《仍坚持》MV，向一众默默耕耘的无线绿叶致敬，以的士司机邵卓尧带出整个故事，现实中这位入行37年，又在无线做了27年的艺员，真的当过8年的士司机帮补生计，他说：“𠮶阵个女啱啱出世，一份人工不多，又撞正03年SARS，公司又发生裁员，我哋亦要减薪。𠮶阵如果不‘爆骚’，一个月一万蚊都冇，所以电视台冇工开就揸的士啰，初时都有少少尴尬，好多时都有人认得，‘咦！…你咪系做戏𠮶个？’但之后倾倾下，佢哋都明白，我系演员唔系明星，你见刘德华揸的士就话奇怪啫，啲乘客都好㗎，有时我唔识路，佢哋都话兼职唔识无所谓啦。”
除了生活，卓尧最主要想女儿有更好的学习环境，他说：“广告都话养一个小朋友要400万啦，书簿费、兴趣班，样样都系钱，我又想发掘下佢嘅兴趣，咁咪做夜更的士佬啰，个女当时都唔知架，只系知我做演员，佢大𠮶咗先知，唔觉得辛苦㖞，做父母梗系尽量俾最好嘅自己仔女啦。”
54岁邵卓尧好多人认得，但不多人叫得出名，原来后生时曾经是邵氏电影小生，更做过电影男主角，他说:“19岁读邵氏艺员训练班，同期有郭政鸿、区瑞伟，21岁好好彩拍咗套电影《小毛孩夺宝奇缘》，咁票房当然系唔得啦，以前大陆戏边有人睇㗎，之后仲转咗行做地产，但89年𠮶阵地产又死，撞啱无线又有训练班咪去啰。”
“认字特警”李天翔爆不续约无线原因：等了20年 不想坐以待毙
89年入无线，邵卓尧由电影小生变为电视绿叶，戏份少，有时甚至演路人甲，但他性格豁达，好快已冲破心理障碍，他说:“初时有少少唔开心啦，但后尾都知小生呢啲30岁前，有就有，冇就冇，冇得强求，我好快都知要向实力派进发，冇乱谂喇。”在无线27年，邵卓尧同好多绿叶一样，有得做，但戏份机会不多，难得他表示团火没有熄过，他说：“你话有冇hea？好老实有时真系有，但好少，譬如拍拍群戏，你系其中一位，大家都知咩事，嚟执骚啫，大家开心就算，但一有戏做，我一定会捉到实，TVB其实好多我呢类演员，做咗好多年，一定系好钟意做戏先留喺到，我哋只系争一个机会，一个角色，呢个机会唔系要做主角，而系一个角色，就算只系得几场戏，我哋都会全力去演，因为有戏做嘅机会真系好少，一有我哋实搏哂命。”
结果邵卓尧在2010年《刑警》等到一个好角色发挥，其中一个单元三集戏，饰演残障露宿者，他说：“好多谢当时导演，即系依家嘅《使徒行者》电影导演文伟鸿，佢俾呢个机会，自己做完𠮶角色，𠮶份满足感，系其他行业好似揸的士、做地产都俾唔到你，咁少戏份都满足？戏多戏少冇所谓，最重要系有得做。”
邵卓尧早前在《Sunday靓声王》获颁《坏蛋王》表扬他多饰演奸角，但他绝不介意，他说：“做演员最紧要有人认得，如果做坏人，有人谂起自己，咁就证明成功啦，做几廿年都俾人印象模糊先系失败，个女成日都讲笑话老豆你又做坏人呀？我话系呀，其实佢都明白嘅。”
区瑞伟在《城寨英雄》弹起，和他是同期兼好友的邵卓尧，不但没有眼红，反而替他高兴，他说：“佢为咗呢个角色1个月减十几磅呀，瑞伟都等咗好多年，佢值得㗎，驶乜眼红人呢？话唔定下个机会系自己呢?每年都有人上位，如果成日谂点解唔系自己上位，咁你咪好辛苦?我哋呢啲有时要当演员系份工，唔好set太高目标，亦唔好计较得失，唔驶一定要自己去到几多线明星，被人认同你系专业演员，对我嚟讲已经好足够，开工唔好hea，认真去做，一定有人睇到。”