楼南光赞北上拍戏待遇好　比较两地分别：香港冇食饭都冇人知

楼南光（Billy）周六（28日）出席《古惑仔》系列限定红酒发布会，谈到自己近来下海从商，皆因香港的影业进入寒冬：“原来内地影业都寒冬得好紧要，因为种种原因有超过一半嘅制作停咗，都唔敢再开。”所以楼南光就开始做生意。他又豁达地认为少戏开是好事：“我哋呢个年纪恨捞唔愿做，我好恨拍电影但唔好叫我拍五日通宵，畀九日钱我拍一日就好；唔揾我拍戏就冇咁辛苦。”

楼南光谈到在内地拍戏待遇很好：“请我哋去拍戏头等机票来回、包食包住、每日有三百蚊吃喝、有专属嘅车同人！我一个人去到片场，对方话要安排一个人照顾我，我话自己可以照顾自己！”楼南光提到那些导演都是看僵尸片长大：“对唔住，你畀我吹下，僵尸片的话我系佢哋儿时偶像，佢哋会好尊重你，生怕你吃不饱、住不好；转机灯位嘅时候周润发都系企喺机面前等，我哋唔会请嚟请去，自己冇带助理，佢会揾专人带你去坐好，惊你辛苦。”

楼南光感受到被尊敬：“而家年纪大咗，喺内地大家会叫我楼老师，系尊重𠮶种称呼，而家甚至叫我老爷子，好似系佢爷爷辈要必恭必敬，因为个导演都系三十几岁，我叫佢叫我Billy，佢拒绝话自己未出世我已经拍紧戏！”同时他又慨叹：“我哋只不过食老本，除咗僵尸、鬼怪、妖魔冇人会揾楼南光拍戏。”

楼南光又感受到在香港拍戏待遇差距之大：“但返到香港拍就系：‘喂！楼南光！埋位喇！件衫你自己拎去吖！’唔系佢粗鲁，但香港嘅情况就系咁，自己拎衫去现场、自己揾地方换，鬼睬你咩老嘢！我试过有一次饭都冇人拎畀你食，冇食饭都冇人知㗎！”对此楼南光不感到落差：“我唔系崇尚内地呢样嘢，但有人当你系大爷咁看待，系舒服啲。两个我都开心，因为文化唔同，内地当我哋系艺术家，香港就系大家一齐捞嘅感觉，周润发都踎喺渠边食饭盒啦！香港人接受西方教育Casual啲，冇阶级观念。”