【专访】宋熙年正式离开TVB 做足12年考虑退居幕后：想由零开始
“咁多年喺同一间公司工作，（离开）系真系唔舍得嘅！”2007年夺得《华裔小姐竞选》冠军的宋熙年（Sarah）于今年7月底约满，离开服务了12年的TVB，自己建立个人团队往外闯。她坦言突然间静下来回复“自由身”相当不习惯，但发现不但时间多了而且来得有弹性，生活反而过得比较充实。亦可以尝试一些在大台未曾做过的事情。撰文：赵允琳摄影：叶志明
宋熙年坦言离开公司初期相当不习惯，不过心态变得轻松了，更懂得享受时间。她简单形容一下自己没有工作的一天：“起身，照顾小朋友，同佢玩呀、喂佢食嘢呀，然后覆email、电话呀，然后出去做生活琐碎嘅事，开会、借衫、去银行，甚至乎整头发、整指甲！最好就赶到返屋企氹仔仔食饭、冲凉、瞓觉，跟住做运动，再同助手倾吓有咩未做听日做，仲要吩咐工人姐姐听日要安排嘅嘢，如果净返少少时间就睇吓电视、上吓网敷个mask！”（离巢后时间应该比以前来得充裕？）Sarah摇摇头，笑着回应道：“反而觉得啲时间好似唔够用咁！以前好清楚每一日有啲咩工作，例如呢日《东张》、呢日《明珠生活》外景、呢日做活动主持等等，依家我会安排做返多啲自己嘢，例如做多啲运动，做瑜伽、揾trainer咁样。然后又到家庭主妇嘅工作，买咩菜、食咩𩠌、安排工人姐姐嘅时间、同仔仔玩嘅时间等等，真系比以前充实咗好多。”
多年来在TVB合共主持接近30个节目，Sarah可谓是大台数一数二的一线主持之一。贵为华姐冠军，气质非凡大方得体，再加上自小于澳大利亚长大的她有一口流利英语，口才了得，但她却未受到TVB的重用，代表作只有《东张西望》以及明珠台的英文节目《Dolce Vita》，未有机会主持TVB的大骚如台庆、颁奖礼等，有不少网民更为她感到可惜，Sarah坦言乐观面对：“呢行不断有好多嘢都achieve唔到！例如你做到影后嘅时候，你又会想进军荷里活，目标会不断咁样更新先会有进步，一定有嘢系未achieve到嘅。最紧要慢慢嚟，我觉得自己未必一定要有好实在嘅目标，有啲人个目标可能系要攞视后，套剧嘅收视要去到某个位、又或者今年要拍几多套剧。但我自己唔系话唔定目标畀自己，但唔会畀一个好‘死’嘅目标畀自己，例如谂吓上年自己有咩进步咗嘅、尝试多咗、工作满意咗，我嘅心灵上就已经达成咗目标，唔需要太完美，因为我觉得咁样太辛苦啦。”
记者留意到Sarah拍照的时候一定会露齿笑，而且亦不断问摄影师“我望落去系唔系好恶？”，原来是因为曾被多次提醒看上去太恶太正经：“我啱啱入行嘅时候好多经理人同公司嘅前辈都同我讲话，我一紧张嘅时候眼神就好锐利，或者系我唔识得点去放缓我自己嘅眼神，再配合埋妆容等等，而我讲嘢又比较字正腔圆讲得好急，所以当我做嘢好投入嘅时候，人哋就会觉得我好似好恶咁。”她笑言幸好自己本人性格随和，暂时未试过被同事误会：“就算有都可能唔会正面同我讲，我觉得我喺呢个圈嘅人缘都ok嘅，从来冇同人有咩正面冲突，哈哈！但系我老公都有同我讲过呢个问题，所以我都不断提醒自己要放松吓自己嘅眼神、或者讲嘢讲慢少少。”
身为皇牌MC，Sarah现时除了以司仪工作为主外，亦会集中火力经营自己和老公陈智燊（Jason）的YouTube频道。她表示离开公司后自由度较高，对于每个工作都有更多机会去参与更多、提供更多意见，亦希望能创新一些，做一些在TVB从来未尝试过的事情。Sarah希望透过自己在幕前打滚多年的经验，与Jason齐齐“踩过界”做幕后：“我哋好想由零开始创作节目，我哋对制作好有热诚，始终做咗咁耐幕前，对某啲嘢多咗好多概念，想搞啲新颖啲嘅嘢！希望拍完之后卖版权畀本地或者一啲海外电视台，例如新加坡、马来西亚等等！”
Sarah自小在澳大利亚长大，而老公亦同样是“半个鬼仔”，会否比较向往外国生活而选择移民，她表示：“澳大利亚都系我另一个家，因为我爹哋妈咪都喺𠮶边，但我依家都几习惯香港嘅工作模式，如果突然返去澳大利亚就要适应另一个节奏，暂时未有移民嘅谂法。不过反而我会谂希望可以一年去澳大利亚住一个月，又带吓小朋友返英国探嫲嫲，因为老公嘅屋企人都喺𠮶边。”至于将来会否让囝囝到外国升学，她表示希望尊重囝囝的想法：“如果我哋有能力，都希望可以支持到阿仔去外国读书，不过呢个就要交返畀佢自己拣，但都当然唔好太细个去啦，起码有少少独立能力先去啦。”她又表示，明白香港现时学生读书压力大，外国学业压力确实较轻：“我当年细个喺外国读书嘅时候都真系几轻松，又冇乜功课做，但我都听依家好多喺外国嘅家长都话，个小朋友啱啱读书都已经比以前多咗好多嘢学，唔系净系香港系咁样。”
现时经常在社交网站见到Sarah一家三口生活过得非常幸福，她笑言可以再增加一个家庭成员就更好：“一定会生多个！希望呢一两年，想生个女！因为有咗仔就会想生多个女！”对将来甚有盼望的她亦寄语10年后的自己：“唔好再咁紧张做嘢，希望同老公一样咁开心，老公一样咁锡我，阿仔仍然咁听话，同埋自己少啲皱纹、一样咁靓，哈哈！”
发型： Nicole Yip@ii hair & nail化妆： Sammy Lam 服装：Cheryl Yam @wwchezw
点击观看更多访问照片：