【后生仔倾吓偈】麦明诗都会怕嫁唔出？　一早揾定几个后备人选

麦明诗自从同林作分手后，先后同过何浩文、余德丞和吴业坤等传出绯闻，年初为准备拍摄大台节目《单车游学团》时，不时与香港前奥运单车选手胡健燊出双入对，除日日见面之外，又一件练车背心两份穿。喺最新一集《后生仔倾吓偈》，有份参与节目嘅潘梓锋(Bryan)、王德志(Danny)和龚朗贤(Lawrence)以嘉宾身份分享跨国“单车旅行”嘅经历，不过就竟然无胡健燊，认真奇怪。
 

节目中，当麦明诗透露Danny系佢嘅大学同学时候，冯盈盈就突然“醒”起啲嘢，仲问麦明诗：“你曾经讲过有个好friend嘅同学，话如果你到几岁都无人要就会啃咗你，系未就系佢？”见到两位当时人尴尴尬尬嘅反应，怕且FYY都无估错，而Danny亦都好快咁承认，仲话：“系有个咁嘅人，如果佢27岁……”27岁？！麦明诗今年刚好27，而且单身，咁系未代表……“其实我系揾咗几个，最唔想𠮶个排40岁、想啲啲嘅排38岁……佢系排到我离婚之后架啦。”

虽然麦明诗好努力咁去解释，但点都解释唔到同Danny嘅27岁的约定，而Danny亦都好配合咁话自己系麦明诗离婚后嘅人选，更笑言：“不过唔知佢离婚时间，同我时间系未一样。”由27岁的约定变成再婚人选，连FYY都忍唔住轻叹年轻人嘅感情观真系好复杂，而麦明诗就突然好似有感而发咁话：“既然去到𠮶个岁数都都揾唔到，你宁愿要垃圾定要屎？”佢口中嘅垃圾同屎，好明显点都有Danny份，好朋友／好同学咪就系呢啲啰，虽然被一众后生仔笑到红都面晒，但Danny就唔系好介意，仲以：“好似周星驰咁讲，一条底裤同厕纸都有佢嘅作用”打完场。麦明诗话晒都系港姐冠姐，而且十优生，虽然暂时感情未有著落，但相信都唔会系要拣“垃圾”或者“屎”。