【早霸王】女听众为咗型唔接受道歉　森美：愈氹只会令人愈忟

道歉真系一门好高深嘅学问，女听众Emily致电《早霸王》“你知道唔知道有人挂住你”话想同男友道歉，原因系自己发脾气兼且要型，结果唔小心过咗火，搞到男友嬲咗，几日都表现冷淡，就连情人节Emily送礼物去男友公司，对方都只系得句“多谢”。而系嬲猪前夕，Emily先啱啱同男友去完欧洲旅行，新年亦有去对方屋企拜年，之不过，就喺初四时，Emily同男友睇完戏之后，男友就急急脚走人，原系因要去朋友屋企玩。“我系嬲佢睇完戏要各自走，佢过往都会送我返屋企，当晚有喺Whatsapp讲咗啲唔好听嘅说话，同埋我要佢讲出我嬲啲咩，但佢就只系不停道歉同话自己唔啱。”其实当自己错咩都唔知嘅时候，又点会讲得出错咩呢……

嬲咗几日，男友提议周未见面，Emily话自己由于仲嬲紧，所以都唔系好理会。“其实系想见，但要型嘛，结果到夜晚食饭先叫佢。”见面后，男友继续系“唔好嬲”而Emily一于“继续嬲”，结果成餐饭都食得非常唔愉快，之后二人亦减少联络，而男友更与友人讨论到底“系责任定爱”。讲到呢度，森美就认为男友愈氹，女友只会愈忟，最应该做就扮无嘢，并谓“如果佢系唔爱你，你嬲一分钟，佢都可以同你拜拜，你唔需要自责，因为唔系你做左咩唔钟意你，而系佢本身或者已经唔钟意你。”Emily似乎仲未明当中道理，更指二人之前先去完旅行（虽然旅行期间都有闹交同发脾气），但森美同小仪都认为一齐旅行并唔代表什么。

森美指每个人喺爱情世界中都有把尺，并认为如果Emily如果真系爱男友多啲的话，就唔会有“要型”嘅举动，而对方睇完戏之后急急脚去朋友屋企玩，都系因为“爱自己多啲”，讲完之后，Emily似乎开咗窍，仲话自己从来都无谂过呢个“爱多啲”嘅问题。讲到型，Emily透露本应16号同男友庆祝情人节，亦都订咗台食饭。“我发脾气话要取消，仲比埋email佢睇cancel咗，但其实我转头有打返去re-book”

电话接通男友阿豪，不过当佢知道女友呢个打去电台嘅举动时，似乎有少少错愕，仲话唔使咁公开。Emily亦都鼓起勇气表示:“我其实好想同你食饭，我唔想我哋咁样，想好似之前咁，你唔好唔听我电话啦。”系森美助攻下，阿豪亦答应听日一齐食饭，至于食完会唔会背脊骨落，就真系要睇下Emily造化啦。

【周五心意运动】您捐一封$50利是，已可为基层送上温饱，01心意呼吁您支持【食德好】，每$50可为12个家庭提供一餐回收蔬果及食物：https://heart.hk01.com/zh/project/10003