【后生仔倾吓偈】被网友讨论“几钱一晚”　朱智贤：我唔系做开

最新一集《后生仔倾吓偈》以“做艺人系咪要面皮够厚？”为题，仲揾嚟朱智贤、胡鸿钧、刘佩玥、黄庭锋做嘉宾，朱智贤话自己暂时都未遇过好攻击性嘅负评，最多都系被指年纪大，但提到最想反击嘅留言时，佢就话试过喺讨论区见到“几钱一晚”嘅题目，令佢十分之嬲，对于女艺人被问价一事，6号认为时有发生，但朱智贤听到6号𠮶句“好常见”后，反应十分之大，“咩好多女星都有？我唔系做开呢啲嘢㗎嘛！佢哋好似已经assume我系做呢样嘢！”朱智贤表示每次见到类似嘅留言都极有冲动想留言为自己澄清。

见到朱智贤咁激动，冯盈盈插嘴表示︰“我知道点解嬲，佢系咪开得太平？试过有人inbox问我五百蚊过夜得唔得？”FYY此言一出，全场人都笑到收唔到声，连本身好嬲嘅朱智贤都忍唔住爆出一句︰“我冇咁低价。”对于被出价五百元一事，FYY有感不被尊重，所以即时将对方封锁。而朱智贤亦都“呼吁”有意问价的话，不妨直接当面问，在旁嘅胡鸿钧反应都几快，即问︰“几钱晚？”朱智贤就好霸气咁回复：“几钱都唔得！”其实讲到负评，FYY近年都有唔少，佢话最介意系被指“cheap”、“上唔到大场面”，更笑言自己本身好优雅，只系为咗同观众拉近距离，所以将自己降级。真系辛苦晒㖞…...