【是咁的，法官阁下．专访】麦明诗道出女性困局：做咩都俾人话！

麦明诗（Louisa），是“十优港姐”，是“剑桥高材生”，现在更是“美国执业律师”，但其实她只觉得自己是一个普通女孩子。演员，或者是她眼前最想做好的事，在《是咁的，法官阁下》中，饰演新人律师夏心宁的她，表现比起之前在《使徒行者2》（2017）和《夸世代》（2017）改善不少，当然还有许多进步空间，但至少算是自然、流畅，只是咬字、读对白时听落怪怪的。

“𠮶时啱啱开始箍牙呀！”麦明诗坦言除此之外的确还有好多难关要冲破，又知道好多观众都好落力地骂她“戏屎”，她亦承认自己在演技上有不少不足之处：“有时系你想做到咁，一早谂定晒点做，但系出嚟唔系自己谂嘅一样；你想做得自然，但系愈谂做得自然，就愈做得唔自然，好矛盾。（你自己觉得有冇进步过？）唔可以话每日都有进步嘅，都真系好睇状态、有冇感觉、对手系边位，好似《是咁的》咁，喺子恒身上都学到啲嘢，因为佢都系元老级嘅前辈，哈哈！”

最近，麦明诗与三届视帝黎耀祥在新剧《杀手》中合作，更在戏中饰演父女，她终于见识到何谓“演技”：“佢全程个状态都好放松，同佢对戏，真系会以为佢问紧我家常嘢，以为佢同紧我倾闲偈，谂谂下先觉得做乜句嘢咁熟，咦，原来系剧本嚟，真系好有功力，佢读紧嘅系剧本，你睇到嘅系生活。”虽然麦明诗会考考获10A又赢过港姐冠军，看似从来没有被任何事难倒，但她却觉得自己未必达到上述的境界：“有啲嘢真系讲天赋。”

从这一刻的表现去断定麦明诗有否天赋，明显是言之尚早，而她亦好清楚在这一点上执着，不会令自己带来更多，努力去装备自己，才是正事：“最近跟紧彭秀慧上堂，佢系比较唔系方法演技，佢系教你揾自己入面嘅感觉，即系你嘅情绪，系好似一种肌肉咁，好似跳高练得多，你都会跳得劲咗，之后你亦唔会咁酸痛。”练得多“不快”、“惊恐”，到需要运用这种情绪时，便能够好精准“跳入去”，做完后又可以快速地“跳出嚟”，不影响演员本身的情绪：“当然跳得入去快唔系演技好嘅最重要因素，但系呢样嘢喺TVB好非常紧要。”现阶段最想冲破的关口？麦明诗坦言因为自己多数做配角，最想学识在有限篇幅内，让观众看出她与对手的关系，比起画面上呈现的个别事件更为丰富。

做演员，的确不是一件易事，而在香港做女演员，绝对是称得上超级难，难在要面对各种流言蜚语、各种中伤负评，麦明诗指所有东西其实源于社会对女性的歧视：“我觉得喺香港做女仔系一件难事，最难嘅系社会对女性有歧视，唔系法律上讲嘅歧视，而系作为女仔，做咩都会俾人话，就好似之前我转述网友话我哋系妓女、系公厕咁，又好似我哋做呢行咁，如果你揾到个‘码头’泊又话你贪钱，找唔到又话你要食自己。”麦明诗不明白为何女艺人婚后淡出，外界为何要赞该名艺人“相夫教子做个好妈妈”，这样对选择了其他生活方式的女性，制造了无形压力：“咁样系咪即系我应该要留喺屋企相夫教子？其实呢啲系个人选择嚟，个风气系有意无间，同你讲点样先至系，女性获认可嘅行为。”

外国有好多女演员都会为此而发声，争取应该有的待遇，又勇于表达自己的政治立场，麦明诗在过去的一段时间亦是如此，但最近一两年却好像被“灭声”，她指自己只是想法有变：“早两年会觉得讲出嚟，可以影响到个社会，但当你发觉有时讲系冇用，就要去做。”“斋讲唔做”是部分香港人的特性，但她绝对不是这类人，早前“偷偷地”到美国考律师牌照，已经引证到她如她所言，是个“埋头苦干；用时间和努力说服别人”的人：“一啲嘢讲咗，只会令同意你嘅人更同意，而唔同意你嘅人更唔同意，咁样系冇意思。”