【是咁的，法官阁下】林秀怡为母节衣缩食唔代表穷：我经济状况ok

大台新剧《是咁的，法官阁下》讲述新晋律师嘅辛酸，不过其实做大台演员，情况都系差不多。剧中饰演黄智贤徒弟嘅林秀怡，入行快10年，曾在《怒火街头2》半裸演出，虽然系受到关注，可惜后劲麻麻。於单亲家庭长大嘅林秀怡，为养家向来身兼多职，不过，早前佢为救患癌母亲，多年积蓄一铺清袋，前境危危乎……

林秀怡接受电话访问时，透露妈妈约三、四个月前证实患上子宫颈癌。“妈妈因为出血所以去睇医生，佢打电话比我𠮶阵，我仲喺餐厅返紧工，自己都呆咗，谂住做埋夜市返屋企再睇下点算，但结果都系顶唔顺。”林秀怡指妈妈属于2B级，只能接受电疗。“我哋都好乐观，听医生建议做电疗，依家完成电疗，妈妈身体比较虚弱，同埋要等一个月后去检查，但因为医生无讲到情况系好系坏，所以都会有少少担心。”为咗陪妈妈抗患，林秀怡过去几个月几乎零接job，幸得经理人公司欲及无线体谅同配合。

“加埋都用咗超过40万，已经系我全部积蓄，所以接下来真系要努力揾钱，我都有同公司讲过咩job都做，唔除衫就得。”其实林秀怡除幕前工作外，两年前她与友人合资开餐厅也是收入来源之一，但到底餐厅赚几多，林秀怡就话其实一直都无认真计过，非常搞笑。“因为系小店，所以无特地请会计，平时都系我同拍档同埋屋企人帮手打理，so far无蚀钱嘅。”林秀怡指自己十分男仔头，化妆品、衫裤向来少买，花费较多在饮食方面，不过，佢口中嘅饮饮食食，原来都系十分平民化嘅谭仔米线同珍珠奶茶。“依家会买啲有机食物比妈妈，会贵少少，同埋以前会食隔夜饭𩠌，依家都唔会。”

林秀怡独力养家早已不是秘闻，不过她坦然会因新闻报导已感到不快。“其实我经济状况ok，未去到咁惨，但成日比人写到好穷咁，到底我要穷几耐？”林秀怡家住天水围，她指区内有不少人情况比她更差，加上自己有手有脚揾食，圈内朋友如蔚雨芯、孙慧雪亦不时介绍工作或者转赠衣服给她，所以就算花尽积蓄帮妈妈医病，她亦未有太担心。