【跳跃生命线】张彦博殉职戏吊威也　颈椎重创：四个月先好返

何广沛、张彦博同郭子豪于《跳跃生命线》经常都以串烧三兄弟姿态出场，之不过，睇到今晚“雄姐”张彦博于出勤时意外殉职，真系心都碎。提到呢场死神来了嘅戏份，张彦博接受访问时透露，当初先系拍厂景爆破部分，之后再以实景拍摄飞落街部分，差不多用了三日时间才完成。“最大挑战系要吊威也，虽然埋位前试咗好多次，但意外嘅嘢真系无得预。”原来张彦博在飞落街时，不慎chok到颈椎，他起初不以为意，仲继续开工，直到有日瞓醒右手无晒感觉才惊觉出事。“我开头以为系压著手瞓，所以麻痹，点知第二日瞓醒右脚无晒感觉，嗱嗱声去睇医生，原来成条颈椎歪咗，做咗好多物理治疗、唞咗不多四个月先好返。”张彦博所指嘅“唞”，其实一样系照开工，只系尽量唔做太伤身嘅工作。“因为拍完呢场戏，先剪头发拍学堂操嘅戏份，所以你谂到有几甘，为咗唔想再受伤，所以依家系咁做gym，希望有啲肌肉保护吓。”

颈椎受伤真系可大可小，不过睇返“雄姐”殉职𠮶幕，真系为之动容。提到“雄姐”深受观众欢迎，张彦博话都有留意网民留言，感觉既开心又感动。“喺TVB无论大小角色都尽力去做，今次系一个好好嘅学习同进步，说实在，雄姐唔系咁易做，要拿捏得好好，有啲对白如果语气用得唔啱，随时熄电视。”张彦博透露当初他为了“雄姐”更连脚毛都脱埋，可惜该场沙滩戏份最终删走一大半，令其光滑美腿无缘曝光⋯⋯张彦博指《跳跃》播出后，除了达成了他今年有剧去继承的愿望之外，另一边厢，其工作量亦愈来愈多，明年的工作计划他亦已度好了。“明年初系会第一次返内地拍网剧，做男二，有得赚钱紧系尽力赚啦。”

雄姐最感人一幕逐格睇