【书展2018】写小说揾唔到食？　王贻兴：读者消化能力低系死因！

近年转攻剧集，担任编剧和导演工作较多的王贻兴，去年书展没有出书，事隔一年“回归”书坛，推出两本关于爱情及生活的散文，《只是暂时不想恋爱》及《回不了去》。曾经以小说夺得不少奖项的他，接受《香港01》专访，亲自回应是否舍弃小说创作。

文字价贱　贻兴：点解仲要写小说？

相信大家都应该知道，创作一本小说需要的时间比想像中来得长，加上大部分时间及心血放在创作剧本，能够挤出余闲写小说的机会少之又少，这种日常矛盾，反映在香港写小说的悲哀：“好老实讲，出小说写到几好睇都好，销量系唔足以应付生存。所以九成出小说嘅人，佢哋嘅谂法都系：出咗小说然后等人买版权，拍成电视剧同电影或者网剧，既然我而家已经直接拍紧电视剧，咁点解仲要写小说，等人买版权，再改嚟拍呢？”

贻兴再以朋友经历佐证，指香港写小说非常艰难：“上年我有啲朋友写咗个小说，有新导演嚟帮佢拍成电影或电视剧，但出到嚟发觉，原著作者除非自己做返编剧或者导演，否则出嚟嘅成品可能完全唔系佢想要嘅嘢。尴尬嘅情况就系佢系原作者，要陪啲人去宣传，但其实佢内心好嬲𠮶班人，将作品‘强奸’唔知变成咩，但系都要照样扮冇事。其实而家写小说都会遇到同样遭遇问题，咁点解仲要经历中间最痛苦嘅部分。”

【书展2018】郑萃雯写医疗育儿书讲凑仔经    不怕过份消费主播身份

人人出书　受众有责

贻兴推出过多本以爱情为主题的小说及散文，问他“MK爱情文学”的Middle成为大众热捧作家有何看法，他直言个人对Middle作品等于“MK文学”有保留，因为这种“文学类别”已经逐渐“失传”。只不过，他认为最大的问题是：“喺任何时代，都有一啲唔知道点解会流行嘅作品同作家！”，他毫无保留，直线抽击，直指人人都可以出书，那些“作家”没有过错，错在为何市场能够容纳他们：“Middle又好，孤泣又好，全部都系咁，如果你怀疑有咁嘅作者，不如你怀疑返点解会有咁嘅受众好过。”

怎样的书才会红？根据贻兴多年写作经验，他归纳出以下见解：

写啲愈系老生常谈嘅嘢，只要好煞有介事咁讲，就有好多人认同你。只要加啲停顿，中间用逗号去表达，咁就有好多人觉得系至理名言、心灵鸡汤。

读者消化能力低　愈老套愈多人Share

常说，今时今日，“大众市场”已崩解，只剩下数之不尽的小众，然而“小众”在香港的写作市场从来没有受惠，读者难辞其咎，因为大多数读者都不愿意思考：“要转多两吓先明白到嘅人生道理，理解佢嘅人，或者愿意花时间消化，然后明呢个道理嘅人，可能又再少一部份。”说穿了，愈老套的内容愈受欢迎，因为够即食，够方便。“好多时候最老土嘅爱情睇法，系最多人share，因为最即食。就算理解能力低，或者对爱情冇好深刻嘅经验，任何人基本上都会有感觉。你揾个靓仔讲，或者再揾个有说服力嘅人讲，大家就会觉得系金句。呢啲就系最容易hit到大众嘅嘢，任何时代都需要呢啲，越肤浅越冇消化能力嘅时代，就越多人需要呢啲。”

从没自贬身价　“作家”身份不离身

当Middle成为今年书展“年度作家”（爱情类）、大家对文字消化能力越来越低成全球现象的时候，问到贻兴可会觉得作家身分越来越轻？他直言作家是一个身分，这个身分不会因为出书多与少而改变，可能有位作家推出了4、50本书，但在于贻兴的眼中，他可能只是一个写手，或者只是揾食的人：“作家对我嚟讲，系有社会责任，有啲嘢系会出声，或者有啲嘢睇唔过眼，觉得真系唔啱嘅时候，用佢嘅方式去表达。未必会直接上街直接讲你听，但喺文章或作品入面，多少都会流露到佢嘅谂法。而喺我眼中，其实好多而家所谓嘅作家，都唔系作家，只系写字嘅人，所以对我嚟讲我写少咗嘢，可能系编剧导演居多，都唔会觉得自己唔系作家。”

至于会否介意别人以“作家”来称呼自己，贻兴笑言在香港自称任何身分都会出事，问题在于心底里又是否认同自己所做的事。若然心无愧的话，都觉得自己是一个作家，而不是写字的人：“至少我出境填表，都系会填Writer而唔系Artist！”

网络主宰“生死”　KOL享尽著数随时闯祸

既然作家这个身分担起了社会责任，贻兴又会怎样看早前小姓奴的偷食丑闻？而作家的个人操守又应该如何维持？他以网络现象来解释：“今时今日冇分公唔公众人物，当网络咁流行，一街都系KOL嘅时候，只要件事发生，够爆，𠮶秒钟，一夜之间就会变成KOL。咁所以点解咁多人会濑野濑得咁甘，可能佢享用咗一啲叫做有头有面，有名有姓嘅权利之余，又唔算系公众人物，做咗好多事，就会发酵到好夸张。所以无论你系咪作家呢个行业，系咪写字，或者系咪KOL都好，网络实在太强大，做咩工都好，你只系唔觉意喺地铁饮水，或者喺巴士同人争执一下，可能有人拍咗你一条片，影咗你一张相，就会成为公众人物，所以自己观念要注意，无论系咩身分都要注意。”