【书展2018】郑萃雯写医疗育儿书讲凑仔经 不怕过份消费主播身份
前无线新闻主播郑萃雯（Karen）自从去年7月离开无线新闻部后，现时身兼多职，包括医疗网站公关工作，亦有为香港电台主持节目，最近更推出新书《儿童健康倾医啲》，起点是Karen于2016年诞下双胞胎男婴“左左”同“右右”，作为新手妈妈，照顾BB时，她遇到好多似是而非的资讯。面对这方面的迷思，于是Karen以其“实战经验”，再总结不同专科医生的讲解，就新生婴儿至学前幼儿的生理和心理健康问题，写成新书。
讲到写这本书的初衷，Karen说自己作为妈妈，由孖仔BB出世到现在，她都遇到过不少问题：“无论BB瞓觉瞓唔好呀，抖气有鼻鼾声呀，甚至发烧呀，真系病𠮶啲呢，我都真系成日烦住我𠮶啲儿科医生朋友，系咁问，咁喺呢方面本身同医生已经有交流㗎啦。”
其次，Karen以往在跑新闻时，专门负责医疗新闻，去年辞职主播工作之后，现时负责经营健康咨询平台，经常都有家长问她一些关于育儿的问题：“我发现当中其实有一啲呢都系我自己经历过或者经历紧嘅婴幼儿呀，生理上或者心理上凑仔嘅问题，有咁嘅人脉喺背后，又有咁嘅需求，不如我又写一本书出嚟，结合我自己嘅经验，咁咪可以同大家开心share啰。”
花两月写出新作 从书中找答案
Karen写这本书只用了不到两个月的时间，而当中有五十几篇内容，为了让读者方便快捷解决问题，在内容铺陈上力求简洁易明：“你当佢系一本工具书，就系问题答案，问题答案……咁样编写而成。”Karen指家长可以直接在目录中找到心中的疑问，一打开书就可以好快找到解决方法，非常有针对性，避免在网上搜寻一些似是而非的答案。
【书展2018】杨思琦重提“人生马戏团”遇袭内幕：当时我净系识震
写几万字牺牲休息时间：将自己种咗喺张櫈度唔郁！
对于Karen来讲，今次写书最大的困难并不是内容，而是过程。要出一本书，少说也要几万字，Karen又要工作，又要凑小朋友，还要赶在书展前出书，时间真是唔够用：“其实喺写书呢个几月里面呢，我除咗同医生做访问之外呢，基本上小朋友一瞓咗觉，甚至乎我一空闲放假呢，我就出咗街，揾间Coffee shop咁样呢，我就咁狂打返啲内容出嚟，不停写。”Karen称自己同“自修”无异，原本计划一日写两篇，但岂料一日一篇都写不了：“结果我将所有嘢谷晒去weekend啦，或者我放假嘅时候去做啦，一次过写9篇咁样。我真系将自己种咗喺张櫈度，唔郁啦，然之后一杯嘢饮就由朝早饮到晚啦。”
为了避免座位被霸占，Karen一坐就一日，连饭都不吃：“咁始终都要去厕所㗎嘛，好面懵嘅问隔离：‘你可唔可以帮我看住啲嘢先呀？’然之后快手去个厕所，返嚟之后又继续打。”这般高强度地写书，Karen也大呻好辛苦：“𠮶个几月我系完全冇放假，近乎冇同啲细路仔玩，或者带佢哋去边度啰，真系要推晒畀我嗲哋、妈咪、我老公去照顾，因为有一个目标系好想完成啰。”
讲到幕后功臣，Karen非常感谢6位医生鼎力相助，不问缘由就即刻帮手；其次都要多谢老公和父母。Karen坦言在写书期间，父母见到自己好辛苦，明明想日日同小朋友黏埋一齐，但是完全没有假期，夜晚在Coffee shop写完回家时，全部都已经瞓觉，“成间屋都黑晒，之后一入厨房呢，一见到妈咪整定啲𩠌呀，同埋啲汤呢，真系会喊出来。”Karen倒吸一口气讲到，她直言每晚回到家中都觉得好失落：“我为我啲小朋友写一本书，但系我冇得同佢哋一齐，当然呢个系一个小牺牲啦，但系喺当下会有种好无助嘅感觉，虽然好多人支持，但好似冇人帮到我。”
再三向医生求证内容 文字力求浅白易明
Karen做了10年的新闻主播，写惯新闻稿的她，会不会特别注重字词呢？“注重个内容上一定要非常之准确嘅，啲资料一定要啱嘅，咁因为亦都除咗系我自己个名之外，医生都有份嘅嘛，咁写完啲内容之后我有send返晒畀医生再睇多次，确保系真同埋准确嘅，因为我都唔想话即系写完出嚟，有人睇咗发现其实入边个内容系错嘅，咁样系会好影响读者同医生。”Karen讲到，以前记者的工作令她非常著重准确性，而这本书作为工具书，无须在内容上雕琢字句，反而要浅白易明。
不担心过度消费主播身份：每个人都有过去！
Karen作为前无线新闻小花，现在又出书，这样做会不会过度消费身份呢？“我谂每一个人都有自己过去嘅工作啦，过去嘅工作经验，对你份新嘅工作都系有帮助、有关系或者有影响，咁睇你点样去运用你之前嘅工作经验带到畀你嘅嘢啰。”Karen解释到：“例如以前做新闻工作者，可以带到畀我嘅系一啲表达手法嘅技巧，或者同人沟通嘅技巧啦，或者系一啲信心，点样对镜头等，其实呢啲我冇可能抹杀，或者撇开佢完全唔用呀嘛，咁既然呢样嘢可以帮助到我喺另一个岗位上，继续传递信息，咁有咩问题呢？”Karen觉得只要不是违背良心，或者令过去工作（身份和机构）蒙羞，并无不妥。
Karen为写这本书，牺牲了不少休息时间，现在终于赶上书展，她也如释重负。本周五（20/7）下午3点至4点，将会在书展举行签书会，届时Karen将与大家分享凑仔经。她透露现在已经开始筹谋第二本书，依然都是讲医疗，介绍怎样育儿，教他们精乖伶俐：“凑仔有好多心酸，希望大家喺好辛苦嘅同时，可以好快揾到方法，咁就可以享受到同小朋友一齐好开心嘅时光啦。”
场地提供：云长小龙坎老火锅（尖沙咀）