【早霸王】接连听抑郁、焦虑症听众来电　森美：好似院友分享咁！

每逢星期五，又系《早霸王》“你知道唔知道有人挂住你”环节，今期女主角马小姐把声听落虽然优雅得嚟带点轻松，但原来佢本身有抑郁同焦虑症，一连两星期都有抑郁患者致电，森美听到之后都笑言好似院友分享会咁。马小姐表示当初完全唔知自己患病，只系以为身体不适。

“后来家庭医生转介我去睇心理医生先知，我先生佢好辛苦，我会成日闹佢，但佢就完全唔出声，而且不离不弃，好想同佢讲I Love you。”马小姐指婚后将所有重心放在小朋友身上，同老公相处时间愈来愈少，有感小朋友长大了，觉得可以同老公重新开始。“好惊佢离开我，我要叫佢唔好唔要我，明白到仲好爱佢，唔想离婚。”

马小姐说患上抑郁症后，因自觉与老公无晒感情，所以不时嗌离婚，直到最近接受治疗，才发现原来仲好爱对方。

森美听罢，提议她除了食药之外，亦可接受行为治疗，更叫她不要太担心。

马小姐之后透露自己有强迫症，除迫老公洗手之外，有时在超市见到货品混乱都会忍唔住出手执货，森美听完似乎十分有同感，更问马小姐系未同老公钖都唔得，但亦不忘提出多项建议。“Dirty吓个老公啦，要将初心表现出嚟，例如系当初点拖佢、点肉紧佢。”

准备打电话之前，森美搞笑问如果老公讲出第二个女名点算，马小姐就话遇神杀神，虽然都明知系搞笑，但森美就好认真咁话爱情真系无得迫。“得唔得你都要面对，唔系你用方法就可以拉佢返嚟，有时愈出力愈推得远，放佢走先系致胜之道。”

今期“你知道唔知道有人挂住你”环节虽然打通电话，但由于马小姐老公正在会议当中，所以好快就收咗线，不过马小姐就决定通过大气电波再一次表白：“听日个女高中毕业，由今晚开始你就知味道，希望以后多啲时间相处，揾返好Sweet嘅感觉，多谢你20年照顾，就算病都无放弃，我真系唔可以无咗你。”