【早霸王】地盘工人向女友道歉中英夹杂　真汉子揾到right person

一讲地盘工人，相信大家都好自然会联想到，前阵子有地盘工人于暴雨下开工而爆出的“系穷呀！XXXX”金句，其实做地盘真系一啲都唔穷，因为一般日薪至少$2000起。而地盘工人除咗“系穷呀！XXXX”之外，原来亦有铁汉柔情一面。就好似今个星期嘅《早霸王》“你知道唔知道有人挂住你”环节主角Gary，他表示今早同女朋友有少少拗撬，所以想借节目同对方道歉。“其实我哋感情路线图都几复杂化，今朝无理佢感受，佢放工好攰我仲问佢啲唔钟意嘅问题，大家都在磨合当中，好想同佢讲声唔好意思，亦想我哋将来会行得更加好。”Gary随后再表示想“道歉同肯定我哋依家嘅爱。”并解释所指的爱情道路几复杂，其实系因为之前所遇到对象并唔系太好，但有感这次终于找到了“right person”所以想令呢段关系更好。

听到Gary说话夹杂了英文，而且表达清晰且文绉绉，森美都忍唔住同佢做边一行，得知Gary原来系地盘工人后，都不禁大赞佢系“地盘诗人”。Gary提到今早之所以发生拗撬纯粹系女朋友为见佢一面。“佢本身返通宵，所以我同时间有好大出入，沟通时间好少。佢本来想今晚同我食饭，但我收工之后有销碎事务要处理（留在地盘整理工具)，怕要赶头赶命食餐饭……”一讲到呢度，森美即时爱情专家上身，指Gary帮对方谂得太多，并认为“如果佢想见你，又点会怕攰呢？你依家只会令佢觉得你唔想见佢。”Gary听完之后并无任何反驳，更十分诚恳咁表示“我要改吓”，又指因令对方生气而感到“好内疚”。呢啲男朋友真系去边揾？

不过可惜的是，电话打咗两次都无人听，Gary唯有在对住空气道歉:“今日真系唔好意思，我完全唔理你感受，我知道自己缺点系乜，我会尽量检讨自己去配合大家的爱情，希望你听到呢段说话会更加开心，I love you。”知错能改，真系唔系人人可以做到。