巨声帮陈康健患罕见疾病 太虚弱拍唔到剧：我食饭都会晕
《超级巨声》出身嘅陈康健虽然唱功了得，但大家认识佢、见到佢都系因为佢不时喺TVB嘅剧集里面亮相，并唔系因为佢喺舞台上嘅表现。多得侧田喺网上贴出一条佢睇陈康健玩Busking，睇到忍唔住要Jam歌唱两咀嘅片段，等大家都谂返起陈康健其实真系识唱歌。
陈康健赤柱晒住玩Busking 感激侧田Po片：等人知我仲努力紧
陈康健赤柱玩Busking唱侧田名曲 原唱都忍唔住畀Like Jam两咀
不过谂深一层，陈康健最近真系比较少机会喺TVB度同观众见面，之前除咗喺《夸世代》客串过一两幕，对上一次比较多戏份嘅剧已经系讲紧差唔多两年前拍嘅《我瞒结婚了》。问佢点解会咁？佢接受《香港01》访问时就话其实系因为自己患上咗一种罕见嘅免疫系统疾病。根据一啲网上资料，呢个病大约系十万至五十万人里面至有一个人“中招”，身体好多器官例如胰脏、胆囊、肾脏、肺部、淋巴结都会受到免疫系统攻击而纤维化或增生肿瘤，致使有关器官功能受损，情况可以好严重。
陈康健就话呢个病好影响到佢之前嘅拍摄工作：“我系完全拍唔到长剧，最多只可以客串，之前我身体真系好差，西医亦都医唔到呢个病，只能够靠调理身体等自己情况好啲，希望日后可以拍返剧。”提到之前佢拍摄《我瞒结婚了》时好似冇咩嘢咁，但佢就话其实当时已经好唔妥：“其实𠮶时我好严重，食饭都会头晕，当时仲未知系咩病，但觉得个人好唔妥，睇医生揾病因揾咗好几年，依家好返好多。呢个病系睇样睇唔到，而病嘅过程令自己成长咗好多，因为好多人都唔知你病，唔知你咁辛苦。”
虽然少咗拍剧，但陈康健就话唔会因为咁而喺生活上有好大问题：“因为好多人好支持我，我有学生跟我学唱歌，做Busking时亦都会收到打赏。”讲到佢之前喺网上好轻力咁提过自己已经同女朋友分手，问会唔会同佢不幸患病有关，佢就答得好淡然：“唔关事，我哋系和平分手嘅。”喺度都希望陈康健佢可以好快好似佢个名咁健健康康，早日康复，喺大家面前唱多啲歌、拍多啲剧。