陈康健赤柱晒住玩Busking 感激侧田Po片：等人知我仲努力紧
撰文： 陈栢宇
出版：更新：
侧田半夜喺自己Facebook贴咗条片，片里面佢就喺赤柱街头度睇到一个街头歌手玩Busking唱自己嘅《三十日》，仲忍唔住行埋去唱两咀添！而原来呢个街头歌手嘅真正身份系《超级巨声》出身嘅陈康健，好多人知道真相后忍唔住大赞佢歌艺拍得住侧田，两个人一齐Jam成件事好疗愈、好感动人心咁。
陈康健赤柱玩Busking唱侧田名曲 原唱都忍唔住畀Like Jam两咀
陈康健接受《香港01》访问时，就话当初真系完全冇谂过侧田会睇自己表演：“我唱前一只歌时，佢已经行咗出嚟打赏我，之后就唔知佢走咗未，但都好想Respect返佢唱一句佢嘅歌，点知佢就打手势问可唔可以出嚟，所以我唱咗半只后佢就出嚟唱半只，成件事好正。佢贴条片出嚟帮咗我好多，起码有人知我仲努力紧，好感激佢。”
讲到陈康健依家逢亲星期六下昼12点至3点左右，都会喺赤柱Busking时，佢就话其实都真系有唔少人睇：“大约50、60人左右啦，但𠮶个位比较晒，所以佢哋都系比较远少少、有遮荫嘅地方睇。有人唔认得我，亦有啲人认得我个样，唔记得我个名咁，但做到自己钟意做嘅嘢，但同时又维持到生活，都已经好开心。”
陈康健就话自己好感激每一个肯驻足观赏嘅观众：“因为赤柱都唔近架，好多人都住得好远特登入嚟。”至于平时Busking会唔会遇到啲咩问题、困难，佢就话揾一个适合嘅位唱歌系有难度：“其实只要收到投诉，你就冇得喺度Busking，而收到人投诉其实好易，依喺赤柱唱比较少呢个情况。”
其实之前陈康健都成日喺TVB嘅剧集亮相，但最近真系少咗好多，佢就话因为自己患咗一个比较罕见嘅病先会咁样，详情喺另一篇文再讲：
+14