【找数】郭富城24年前承诺结咗婚向全港巿民派利市：人人有份！
撰文： 冼燕珊
出版：更新：
好消息！虽然政府好多年都无派糖，但唔使惊，我哋今年(可能)有郭富城向全港巿民派利是，事关佢于1994年，即系24年前，曾经喺电视镜头下，许下承诺，话如果佢结咗婚，一定会派利是：“希望有一日我将来结咗婚，我才派利是，个个都有份，我讲过嘅，全港嘅巿民都会收到我嘅利是。”
多谢城城呀真系！等咗24年，终于都等到你结婚喇，于去年4月迎娶比自己细23岁嘅方媛！恭喜贺喜，全港巿民今年收多一封利是过年。城城呢条24年前接受祝文君访问嘅片，早前已经于Big Big Channel上回带过一次，今日大年初一，再被应节摆上台，好多网友都留言，大家一齐集气叫城城找数！
唔知城城自己其实记唔记得自己讲过呢翻说话呢？其实唔惊嘅，城嫂方媛帮佢生咗个小公主吖嘛，找完数之后，再同全港巿民拜返年，帮手逗翻啲利是可能仲有赚添！