【夸世代．有片】张继聪被封杀继续宣传：如果系最后一套都无憾

好多成功男士都拥有“四仔”：屋仔、车仔、老婆仔、BB仔，张继聪应该算系相当成功嘅一位，虽然早前忽然无辜受老板萧定一所累，突然被TVB封杀，不过其实佢都系KEEP住密密做。1月11号系阿聪38岁生日，佢都拣咗努力工作朝早开工拍电影，夜晚先同家人食饭庆祝。阿聪开LIVE同网友分享生日愿望之余，仲不停叫大家要睇《夸世代》：“呢段时机好多朋友问我做乜仲咁努力宣传，只因为我真系好爱呢个作品。如果呢套系我暂时最后一套剧，但真系好满足算无憾啦。”果然非常专业又大量呀﹗

今年首次一家四口过生日嘅阿聪，过得相当开心，平淡得黎又有惊喜，除咗电影剧组有送上蛋糕，佢仲分享家人嘅小心思：“今日好开心，朝早开工剧组有同我庆祝，返到屋企又有同家人食饭，太太同囝囝Handmade张生日卡俾我，爸爸妈妈煮咗丰盛大餐，连工人姐姐都自己整个靓蛋糕送俾我，原来佢系半夜偷偷地喺屋企整架﹗”谢安琪都有出POST表示，原来因为上年阿聪有投诉所以今年要识做：“旧年有人话我冇送生日礼物比佢……今年有哥哥同我一齐自制既生日pop up card，仲有一位令你情难自制嘅BB女喺你房等你。”

而阿聪仲开LIVE同网友分享生日愿望，讲唔够几句话题就转咗Sales上身，不停宣传《夸世代》：“大家有无睇夸世代呀，walking dead好睇下吗﹗睇呢套戏四十几集，日日追都成为生活一部分啦，多谢joe珍姐邀请我参演呢套台庆剧，仲有梳化服同事，50集有过百演员，真系要用好多心机好辛苦。仲有PA同事，可以话系最艰巨工作，如果你想锻炼仔女嘅就叫佢地入TVB做PA啦，做得几年体格同品格一定变得好好……”下删过千字感谢。

其实大家都知《夸世代》播出无几耐，TVB就翻旧帐因为同萧定一公司纠纷，而无端端封杀张继聪，之后嘅宣传活动都唔再邀请阿聪出席。虽然系咁，但其实阿聪一直有尽自己本份喺Facebook落力宣传，呢日佢亦好感性地话：“随住第50集播映完毕，我嘅TVB拍剧生涯应该暂告一段落啦，我都唔知几时再喺电视机见到自己啦，所以都真系百感交集。如果呢套系我暂时最后一套剧，虽然拍𠮶阵好辛苦好辛苦，但真系好满足算无憾啦。呢段时机好多朋友问我做乜仲咁努力宣传，唔系因为任何原因，只因为我真系好爱呢个作品。”