【夸世代】张继聪CUT收费电视被刁难　网友大赞有共鸣

台庆剧《夸世代》一早讲明，向以前的经典剧集致敬，每一集都有啲场口大家会觉得熟口熟面，但原来唔止致敬，呢套剧仲会不停抽水添。最新一集中，张继聪携同机顶盒，到收费电视客户服务中心要求中止服务，被笑容可掬睇落好帮手，但其实百般刁难嘅CS小姐玩到氹氹转，仲有个客拎刀出嚟要CUT台﹗咦？呢一幕好似系友台经典场面嚟噃﹗

剧中张继聪去到“长线电视”客户服务中心，排完一轮，一坐低就递上机顶盒及身份证，向职员表示想中止合约，估唔到恶梦刚刚先开始：“先生，跟机顶盒𠮶条线呢？HDMI线呀，先生如果你无带𠮶条线嚟，我无办法帮你取消服务噃。（我留部机顶盒喺度，依家返屋企拎条线）先生你要取消服务要填份FORM先。（麻烦你俾份FORM我填）表格我哋无㗎，你需要上我哋官方网站，喺上面Download落嚟填㗎。”

有盒话无线，有Form但无得提供，张继聪都不禁由好声好气，变成提高声量质问：“你哋烦唔烦啲呀﹗当初氹我签约时随意签名就得，依家我要CUT台就多多要求，九十几万样嘢。总知今日我一定要CUT台。”点知又被告知要提前两个月通知，激到张继聪生虾咁跳。

正想理论之际，隔离嘅客人已经拎把菜刀出嚟大闹：“我已经跟足你哋指示做都话唔得，我忍够啦知唔知呀，又冇英超，又冇西甲。”仲拎出一个疑似火水樽点燃想同归于尽，令人不禁谂起3年前有男子持双刀到有线电视要求CUT台一事。睇到呢场戏，电视机前观众们都应该身同感受，安装易CUT台难，拎齐配件又话无Form，寄又唔肯收，开放时间又唔长，早在8年前已经有条“"希特拉" 都取消唔到有线合约”嘅二创片段流传，《夸世代》呢一幕播出后引起大批网友共鸣，大赞呢一幕真系靓抽呀﹗