张继聪连宣传都冇份　拍片默认被封杀：多谢大家支持

商业社会中，公司同公司之间有纠纷实属平常，有问题可以倾，倾唔掂可以用法律途径去解决，不过原来有时候会连坐法惩罚埋唔系几相关不过系同公司的人士。去年TVB同萧定一公司因电影片酬问题打官司，近日忽然传出要封杀，有份主演热播中台庆剧《夸世代》嘅张继聪，连宣传都唔使佢再去，而佢本人就拍片放上网证实封杀一事。

张继聪喺23号晚上，于Facebook上载53秒短片，亲自交代被封杀一事：“大家好！今日出咗单新闻之后，好多谢大家嘅支持，咁可能嚟紧有一段时间唔可以再喺将（军）澳出现…有啲说话都想喺度交代。首先喺过去嘅日子好多谢TVB嘅栽培，畀咗好多机会我，好多谢珍姐（曾励珍）。入面好多台前幕后嘅兄弟姊妹，好多谢你哋，俾咗好多美好回忆我。”虽然无辜被封杀，但阿聪依然表现乐观，话会随遇而安，仲呼吁大家要继续支持《夸世代》。

呢次封杀可谓毫无先兆，本月16号张继聪仍有出席《夸世代》宣传，大玩体能活动，21号无线其中一个Facebook Page“See See TVB”，于晚上9点仲上载一条张继聪拍摄嘅花絮片段，点知24小时都唔够就传出封杀新闻，只能讲句，真系好难捉摸呀！