【溏心风暴3】48岁唐文龙单身过圣诞　无女陪唯有揾兄弟睇星战

《溏心风暴3》中饰演型佬教授阿Nic（郑立安）的唐文龙，一出场就成为城中热话。网民like爆之余，亦对阿Nic这个角色恨之入骨。皆因他在爱情上又尽享齐人之福同时拥有Daphne（胡琳饰演）及黄以爱（陈敏之饰演）2位靓女（即系个角色衰花心啰）。不过戏内大家睇佢就幸福滋润，但戏外唐文龙的感情生活其实都dry dry地。唐文龙话假日都系同好兄弟睇下《Star War》。

钟意《星球大战》其实都冇咩唔好，话哂都系“男人的浪漫”，就算是唐文龙这种铁铮铮的硬汉也喜欢。唐文龙接受《香港01》访问时也大方承认自己是一名宅男。“其实我系宅男嚟㗎。我系钟意运动啦练功夫，但系你话出去玩出去蒲又唔系咁多机会。我都打机嘅，行街食饭睇戏正常人做嘅嘢，我都会做，但系就喺屋企多嘅，睇吓书呀咁样啰。”照咁睇都唔错，又系型佬，又识泰拳，又会做运动，又唔蒲，又黐家，又够文青⋯

讲到兴趣㖞。其中一个可以增进感情嘅活动，就梗系睇戏啦。型佬唐文龙接受《香港01》访问时说：“睇戏睇西片，其实我咩片都睇，韩国日本泰国我都睇。睇鬼气啦科幻警匪、美剧加拿大剧好钟意，甚至乎吸血僵尸都钟意。（最近睇咗边套？）《星球大战》《正义联盟》。”虽然就离题咗少少，但系唐文龙都讲咗2句关于《星球大战》电影观后感。（冇计，men talk吖嘛）唐文龙：“《星球大战》呢，今次我满意嘅。特技嚟讲我就觉得麻麻地喇，不过就睇个故事啦。而我觉得对于Luke Sky Walker嚟讲，就俾咗一个好好嘅结尾佢。（咦，有睇开㖞。）有㗎，我细细个就睇星球大战长大㗎嘛。”

睇到呢度，相信大家都应该对唐文龙嘅兴趣有返多少认识。至于最为重要的，“型佬唐文龙的择偶条件”，他想了一想就回答说：“女朋友嘅条件。我就钟意白雪雪嘅，高矮就真系冇乜所谓。同我有共同嘅价值观啦，最紧要倾得埋，呢个好紧要。（有共同兴趣，例如钟意睇戏，又会加分？）其实都系一件好事，因为恐怖片、科幻片，我乜嘢语言都会睇晒。如果佢钟意呢一种生活形态，对我嚟讲都系一个配合。”

如果对于“笋盘”呢个字眼有保留的话。不妨又睇吓剧中饰演阿Nic（唐文龙）的老婆胡琳点讲：“我觉得佢好识得take care其他人。我发觉佢好细心无论系身边嘅女仔，cameraman或者打灯（师傅），所有人都好细心。仲有我觉得佢知识渊博嘅程度，就系你问佢任何一样野，佢都可以同你讲两个钟头，所以佢系一本好厚嘅书。”

听讲唐文龙对上一个女朋友都系喺facebook识，所以大家嘅机会都系平等㗎。咁啱又系圣诞节，真系机不可失⋯