【永恒亚视】招募艺人撑开台　网民票选胜出者赢合约你恨唔恨？

今时今日喺香港，想表现自己比以前容易得多，拍片放上网多人睇已经可以自称KOL，比较有质素嘅可以储到一批支持者，收钱拍广告片。网上红咗之后呢？好多KOL最终都系走入娱乐圈，拍戏做主持拍广告，始终喺香港，电视系最快入屋嘅方法。永恒嘅亚视无限复活，18号即系听日就会推出新嘅OTT数码平台，原来较早前已经喺网上招募艺人，网民都有份投票，胜出嘅除咗有份艺员合约仲会有I PhoneX添呀﹗

永恒嘅亚洲电视，就好似杂草一样有极强生命力，就算拖几个月粮依然可以运作，被申请破产都可以拆得掂，加上唔少艺人都话其实亚视算系好高薪，入去做嘢似乎都唔错。亚视新网页入面有个“你的艺人招募计划”，参加方法好简单，提交个人资料、5张照片、列写过往演艺经历，连自我介绍短片都唔使拍已经搞掂。进入决赛后于指定时间喺亚视Facebook专页进行不多于一小时的直播，仲会开放俾网民投票添。

玩得比赛当然想赢，但赢咗有啲乜？除咗有“亚洲电视数码媒体有限公司艺人合约”仲有丰富奖品，不过可能未倾掂赞助，丰富奖品暂时只得一样，就系 iPhone X，唔知系64GB还是256GB呢？不过参加得比赛，相信参赛者会关心签完约有几多演出机会多啲啦。