苑琼丹4月返TVB拍剧 冇帮亚视复活：唔食得两家茶礼
撰文： 郭敏玲
出版：更新：
“石榴姐”苑琼丹最近投资过千万大搞生发中心，今日一身“石榴套装”现身舖头，同大家讲：“我用晒成副身家落去㗎喇！”
艺人有副业好正常，多数开餐厅，又或者买下Fashion，但苑琼丹就搞生发中心，因为她一直有寻生发：“我试过好多方法，外敷内服又试过，食到入医院就嚟死都试过，直至揾到呢个咁天然嘅方法，所以咪索性倾埋专利。”
买咗专利咁犀利，难怪苑仔用成过千万，所以就要接广告、出show帮补下。而她亦对外透露下年4月会再返TVB拍剧：“我将喺大陆赚嘅用晒，喺TVB赚嘅钱都用埋，所以我要喺TVB入面攞返晒！”她将会与郑则士及张兆辉合作拍喜剧，剧本也是为她度身订造，是否会以“石榴姐”造型示人？“石榴姐就唔会喇，我做返我自己，我系做大家姐！呢排都开始写嘢，谂下啲金句，希望吸引到啲观众再次留意返香港嘅电视喇。”
亚视1月就会复活，有不少艺人都获邀加盟亚视，原来苑仔都有份，她说：“有签咗亚视嘅朋友揾我，问我可唔可以去电视台拍节目，我就问咩电视台？佢哋话系亚视。”苑仔当堂听到都吃了一惊：“但已应承返TVB，亚视复活嘅事，咁就做唔到啰，我已经嫁咗，嫁咗就唔可以再嫁多次㗎嘛，唔能够食两家茶礼嘅。”而ViuTV都有揾苑仔做Talk Show，不过又系畀苑仔推咗：“我签咗1年，4月之后就真系TVB人，咁就趁4月之前陆陆续续喺唔同地方出现啰。”