【TVB Secrets】新人卖桥被ban 　前编剧：佢地话50岁师奶睇唔明

上篇提到无线请编剧超难，入职后当见习编剧人工超低，不会高过1万2千蚊，做新人人工低其实是正常的，尤其在香港从事创意产业，但究竟无线编剧返工做咩呢？再请前无线编剧阿巢（化名）为大家解说：“睇你跟边个啦，有啲返朝九啰，但多数返11点几，其实度桥都几开心，喺间房入面，有个好大嘅白板，红色、蓝色、黑色side pen摆晒喺度，新人通常有部电脑mark低大家讲过乜，大量零食呢啲必须啦，烟仔而家就唔食得嘅，３点几新人多数负责去西餐厅买下午茶返嚟，开工就编审、编剧、新仔都坐埋一齐，有时套剧嘅监制都坐埋嚟jam下啰，大家喺到乜都倾，以20集剧本为例啦，一集大约30场戏，总共６百几场戏，你冇可能一个写哂，所以一定系每人都写啲，通常日头倾好分场，咁就夜晚返去写，套剧嘅前期好轻松，夜晚7、8点收工，愈近开拍就大镬，11点甚至更夜都未收，因为又要度又要写。”

创作的确需要新思维，TVB好积极请新人，但新人发挥机会，反而不多，亦因为制度令他们由创意澎湃变成墨守成规，阿巢说：“初时真系以为可以天马行空，我哋成班同期新人掟好多新嘅idea出嚟，当然未必个个都work，有啲真系幼稚嘅，但上面𠮶班同我哋讲，我哋嘅target观众系50岁或以上嘅师奶，你哋谂呢啲佢哋唔明！哗！真系咩热血呀、激情呀俾佢淋熄哂，大佬！目标观众唔可以set年青人㗎？真系想同佢哋讲，50岁师奶都好有要求㗎，我阿妈睇咗咁多年TVB，都转去睇星星《来自星星的你》，睇宋仲基啦，师奶都变咗喇，咁新嘢佢哋唔要，咪俾返以前𠮶啲A餐、B餐，佢哋熟悉嘅嘢啰，咁你慢慢就....变成佢地咁，一样收廿几点收视，但系咪代表好呢？有新人试过好大胆咁讲自己意见，用好礼貌方式同编审唱反调，但结果被人调走咗，咁你话做新人仲边敢出声呢？”

无线剧集经常被网民发现桥段熟口熟面，甚有抄人之嫌，但阿巢话这个抄人风气，自古以来都有，最大问题是他们觉得冇问题，他说：“佢地唔系唔知抄人，而系佢地觉得抄人冇问题先系最恐怖！成日度紧某的场景，示爱呀，枪战呀，突然谂起边套戏都睇过㖞，就索性成条桥搬落去，加少少嘢都唔会㗎，最好笑佢同你讲，发哥《上海滩》好经典啦，𠮶场抢赵雅芝，咪又系抄《毕业生》，个个咪当神咁拜，冇事嘅，用啦！咁咪成日俾人睇唔起啰！当然有啲系逼于无奈，无线系剧集工厂，20集嘅剧大约3个月拍完，一日厂景、外景加埋要拍20页纸，天才都冇可能谂到咁多桥，以前呢套未度完，已经要度下一套，而家就好好多，俾时间你做下资料搜集，以前冇计又冇时间，咁最好方法系咩？抄啰，都系𠮶句啦，一台独大，每年亿亿声咁赚，公司自然用最快捷嘅方法啦。”