【国际小姐】王咏珩备战11月出选　香港代表评港姐：注重娱乐性

港姐唔好睇！大家钟意睇靓嘢，梗系睇国际小姐啦！除咗澳门入围佳丽Sofia当然仲有土生土长香港代表阿Wing王咏珩啦！阿Wing有样有仪态之外，估唔到佢超级钟意做运动，尤其泰拳同做gym系佢至爱，临近11月就要去日本参加国际小姐选举，Wing正系加紧锻练，誓要操到最fit去迎战。场地：FAC

今年23岁嘅王咏珩身高5呎8吋，但原来曾经系肥妹仔一名，Wing：“最肥系中二嘅时候，我系一个肥妹，128磅呀！”佢话肥到唔想再提，所以再三要求都唔肯交出相片。

佢又极之为食，尤其梅菜扣肉、东坡肉系超级至爱，又喜欢凌晨2点食杯面，就算做咗模特儿之后依然戒唔到，直至最近入围咗国际小姐至加紧操fit：“我最严重系个肚腩，最钟意大鱼大肉；其他佳丽好好身材，一啲肚腩都冇，相比下我系输蚀。做model好少着啲少布衫，但系选国际小姐要着bikini想缩都冇得缩，而家嗲哋叫我食梅菜扣肉我都耍手，同埋要多啲打拳做运动啰！”阿Wing学泰拳已有两、三年，现时打拳之外每晚要做sit up等收腹运动，希望赶得切喺选美前修身。

讲起今届港姐连试食都算系才艺表演，阿Wing只系笑唔想评论，但表示将会同澳门小姐Sofia喺国际小姐决赛日合作表演跳舞，Wing：“我哋商量过一齐表演，我哋两个都学过跳舞，但系佢跳开葡国土风舞要一大班人跳，所以决定就我跳girls hip hop，不过未坐低倾跳边只，暂时未睇得住。”佢解释国际小姐选举同港姐有好大分别，国际小姐可以选择做唔做才艺表演，就算表演亦未必会加分，但佢同Sofia就希望趁呢个机会表现下自己。

不过比赛临近亦令阿Wing心情紧张：“瞓唔着，压力大有时临瞓前谂起会突然心跳加速，feel到有啲焦虑。”所以更加需要打下拳减压。

阿Wing参加国际小姐而唔去选港姐，系因为觉得更有国际性，认为两者性质好唔同：“国际小姐更注重仪态、表现、catwalk等等，但我觉得香港小姐畀大家嘅娱乐性系更重要，所以性质唔同唔系质素冇咁好，而系大家目的都唔同！”