【国际小姐】王咏珩拍短片做过“野蛮港女”：我平时会嗲人

今届港姐雷庄𠒇（Juliette）劣评如潮，大家注意力都转移到国际小姐身上，其中香港代表王咏珩（Wing）旋即成为网红，23岁嘅Wing系兼职模特儿，言行大方得体。虽然未有任何拍戏经验，但好多人都唔知原来佢拍过短剧仲饰演巴喳女友，抢男友杯面兼当街扭耳仔，不过Wing接受访问时就话真实嘅自己唔系咁，而系小鸟依人㖞！

现年23岁的王咏珩，身高有1.76cm，行出嚟都有台型过人，Wing拍过唔少广告，亦做过黄剑文《我们的》MV女主角，但实则演戏经验比较少，但仔细搜寻一下，原来Wing早前拍过两套搞笑短片，都系饰演野蛮女友，同佢选美形象有好大出入。

Wing为“港乜嘢”facebook专页拍过两段喜剧，一段喺中环码头外，饰演男友嘅“幸福毒男晒冷”想当街嘴咀Wing，她初初都好配合作状贴近男主角，但到紧张一刻Wing突然封嘴：“我哋都系刷咗牙先啦！”就转身走开；镜头一转Wing同男友喺便利店食杯面，Wing个杯面太辣，即刻抢走男友𠮶碗交换，都几蛊惑。

另一个故仔更加港女，Wing发现男友手机like其他靓女，即抢走电话变晒老牛声狂闹：“我最近up咗咁多相，又唔见你like下我啲相，你想死呀？”讲完仲扭男友耳仔，好恐怖呀！

王咏珩喺电话回应时讲起呢两段片即哈哈大笑，话系第一次帮朋友拍搞笑片，问佢点解最终冇嘴戏，佢话系为咗身边人：“暂时介意拍锡戏呀！未放得低呢条线，唔想做影响身边人唔开心。（系咪男友？）唔只男友，仲有爹哋，爹哋唔钟意㗎，有时会话我：‘著到咁’。”

Wing又强调平时唔系野蛮女友：“平时嘅我系小鸟依人，会嗲男友，又会嗲爸爸妈咪，但唔系烦𠮶只，我突然又可以好率直㗎！”佢话因为短剧比较搞笑，所以用比较夸张嘅方法去演，但佢自问演技唔好，希望日后有机会拍多啲。

讲到Wing嘅男朋友，佢话传媒称佢为金融才俊其实唔系好啱：“佢只系打份工，又唔系金融界。”其实佢唔太清楚男友工作㖞！至于相处方面原来曾经嗌大交，经过磨合期之后而家又回复热恋期，所以唔会做野蛮女友啰