【任噏乱评】《踩过界》焗摆炮灰档期　其实呢套剧比更多一线剧好

《踩过界》已经去到结局篇，不过套剧嘅讨论程度好明显无《同盟》咁热烈，如果讲剧情，虽然唔系《同盟》咁要估大佬，不过每一个法律个案都做得好细致，好少有闷场。讲演员，几位主角的演技亦都唔会输俾《同盟》，王浩信的演技甚至愈来愈升华，连做盲人都难佢唔到，爆牙蔡思贝亦一改以往观众对她的劣评，张振朗甚至因为呢套剧而在大陆走红，咁究竟点解《踩过界》好似无乜人讲咁呢？

第一个好大嘅原因，系因为放咗系星期六、日播放，称呼为炮灰档期。要知道无线一向做法都系将重点剧集放喺星期一至五度播，之前有一段时间播足一星期七日，结果因为星期六、日的收视过低，间接拖累整套剧的收视，所以放弃这个做法。可能无线觉得唔甘心放弃周末呢个市场，结果将《踩过界》放喺呢两日度播，希望吸收埋呢段时间嘅观众。结果？未如理想，要知道周末晚上有好多人都可能会出街食饭，睇吓戏唱吓K，总之就比星期一至五更加少留在家中睇电视，咁套剧好自然无咁多人睇，甚至流失埋一班一直在星期一至五追剧的TVB死忠。在《踩过界》播完之后，新一套《杂警奇兵》又有新玩法，只放在星期日播放，绝对系更加劲嘅炮灰档期。

第二个原因，《踩过界》系同大陆爱奇艺合资制作嘅剧集，系呢个年头进军大陆实在无可厚非，得到大陆资金或者可以推动剧集质素。但系为咗讨好大陆，竟然比爱奇艺率先播放，搞到香港都未播完其实大陆已经睇完晒，有心嘅观众根本可以轻松上网睇晒，唔使等到无线慢慢播，仲要系隔一个星期播。虽然监制话过结局会有所不同，不过系人都知只系一啲无关痛痒嘅小情节，其实真系无乜意欲打开部电视机慢慢睇。

无线将《踩过界》放喺星期六、日播，有可能是想参照外国剧集的造法，因为外地其实好多时都会一星期播一集两小时左右的剧集，反应都一样咁好。不过无线可能无谂过，你自己做咗咁多年都系星期一至五播放嘅做法，唔系话改变就即刻变到，点都会有个阵痛期喺度。星期一至日播，收视唔好又变，而家星期六日播，反应未如理想又变，咁唔通之后只系星期日播，衰咗又变喇㖞？咁样变嚟变去唔单只令到观众唔适应，直头系玩死咗啲剧集。

其实《踩过界》嘅收视唔差，放喺星期六日播平均都有23点左右，最高有25点，即使《同盟》咁好反应，喺系大结局𠮶集嘅综合收视最高都系得29.8点。喺大陆，网上点击播放次数更加系超过五亿次，仲拎埋“2017金骨朵网络影视盛典”嘅“年度十大精品网络剧”，令我有理由相信，如果无线将呢套剧放返喺平日播，无论收视、回响、讨论都一定比而家来得大，甚至可以似系《EU超时空任务》咁成为颁奖礼黑马，而家要争奖？难了。