【踩过界】朱千雪示范完美女友　尊重男友私隐：唔使佢share位置

全民估完《同盟》边𠮶系Rainman后，今日就连续4晚播《踩过界》结局篇。今晚讲盲侠知道Yanice死非常心痛，仲不时回想起她，剧中王浩信、朱千雪浪漫凄美，但现实中朱千雪不会追求电影式的爱情，反而是一个很理性的人，千雪BB今日接受《香港01》访问，更表示有时喜欢一个人的浪漫，她说：“戏剧永远比现实浪漫，所以我睇日剧韩剧都系一个人睇，有时你睇完都觉得好sweet呀，但你身边𠮶个未必会觉得，咁我咪好无瘾，所以浪漫戏自己睇好啲。”

朱千雪爱一个人睇戏，亦不“黐身”，她透露男友大部分时间都在新加坡工作，每次返香港逗留很短时间，“多数系星期六日返，又唔系个个星期返黎，而且我开始要返学，所以都要就下啲时间。”提到睇戏都系一个与男友联络下感情嘅活动，她就笑言，“我同佢睇戏机会真系唔多，都系各有各睇！因为大家都系唔同地方工作，边有时间夹到呀！就算睇戏我首选都系笑片同superhero电影，反而从来无另一半邀请过自己睇浪漫电影。”千雪BB讲完呢句之后，都忍唔住大笑咗一阵！

相隔异地拍拖大部分都系用message联络，千雪BB都唔例外，仲话自己性格好急，好多时候都要人即刻秒覆，但对另一半似乎就比较松懈，“我对而家啲同学都系咁，但对朋友就唔会，因为唔会有紧急嘅嘢，都系啲无聊嘢。(咁会唔会要另一半share 位置俾你？)我好尊重私隐好惊人干扰我，所以我都会尊重返对方。其实无论系咩关系，就算屋企人同朋友都好都要尊重嘅。”

千雪BB 6月接受《香港01》专访时其实都有透露过有一位对象了解中，即系而家𠮶位Justin，当进行玩爱情心理测验时讲过男友最好系由朋友开始，咁由细识到大嘅Justin嘅条件真系好啱，“钟意由朋友开始系因为系熟悉𠮶个人，我觉得而家所有嘢都系舒服，因为用朋友方法去开始系最好，无压力呀嘛。”问到现时专注学业同工作嘅佢点样与在新加坡工作嘅男友维系感情时，千雪BB就话，“都无嘅，我地各有各忙，而且工作时间都唔会影响大家，所以就无乜冲突，同埋佢都知道我读书好忙，佢都好明白。”

讲到日前千雪BB就被影到与男友温馨短叙两小时，她就话要特别澄清并笑指，“佢从来无出现过，佢根本都唔系香港，我睇到之后都觉得好恐怖，仲即刻打俾佢问佢点解返黎香港唔揾我。”对于拍拖一事令不少网友心碎，千雪BB都系𠮶句希望大家先专注其工作，亦提到与男友相识经过，“我地好细𠮶就已经识，两边父母都系好好朋友，同埋我同佢未系好熟嘅时候见到都会say hi。(咁家人都好支持拍拖？)无话支唔支持，咁大𠮶人都有空间去选择自己嘅朋友嘅。”