【早霸王】网上识女仔打上电台表白　森美惊青问：又未拍过拖？

今日《早霸王》表白环节又嚟喇！遭遇过连续几次滑铁卢之后，森美同小仪都惊惊喇！森美一听电话就表现得好紧张，兼打定底：“你钟意𠮶个一定有男朋友呀！”喂故事未听到最后，真系唔知会点呀！

森美同小仪今日喺《早霸王》一到咗“你知道唔知道有人挂住你”环节就即刻紧张起嚟，工作人员接咗男听众阿Ray电话入直播室，森美立即打断佢说话：“唔使谂喇！你钟意𠮶个一定有男朋友呀又系。”听众Ray都嚟唔切反应，森美又讲：“好简单，而家啲男仔，如果你钟意一个人，又唔去表白，又唔做任何事去暗示，去到最后乜嘢都冇做过嘅！咁死嘅机会梗系大好多啦！”

森美讲完一大轮，Ray终于有机会讲自己点识个女仔，但只系讲喺网上讨论区识咗两、三个月，森美又插嘴：“时租女友呀？你咪㖞！时租女友俾钱㖞同你出街，援交网站呀？”不停逼阿Ray解释系咩讨论区，搞到Ray唔知好嬲定好笑。

森美可能惊再遇上“奇难杂症”，直接问Ray；“佢系孤单人嚟嘅？”Ray答：系呀系呀。”听得出森美、小仪松一口气。

阿Ray原来好浪漫，同心上人出过几次街，第一次就约睇日落，第二次则去南丫岛行山，跟住又系睇日落，仲掂过下手仔，女仔仲挨过佢膊头添；阿Ray更喺送女仔返屋企嘅时候表白过，不过女仔话未拍过拖要时间考虑下，讲到呢度森美又开始淆底：“又未拍过拖？几紧张下㖞。”小仪都惊惊地：“应该冇乜问题喇卦，不过女仔第一次。”

跟住打畀女仔阿Dean，原来阿Dean听紧节目而且似乎对Ray几有好感，森美问：“咁点呀？接佢入嚟喇㖞！”Dean念羞答答咁话：“ok呀！”森美仲未敢相信：“我唔知乜嘢ok吓！”好明显仲有心理阴影！不过今次真系成功喇！Ray问女方愿唔愿意做佢女朋友，Dean答咗句好，安乐晒！森美真系松一口气：“讲完喇恭喜你哋，bye bye！”似乎最开心嘅唔只系呢对情侣，森美同小仪终于过关喇！