【早霸王】怕丑仔拖到女神准备打上电台表白　结果连森美都呆咗！

爱情有几可风平浪静？商台节目《早霸王》又遇上非一般case，怕丑仔阿龙钟意咗清纯义工妹，连手都拖过，但当森美同小仪谂住呢铺做得成邱比特嘅时候，真相令身经百战嘅佢哋都哑咗两秒！

上星期已婚男向人妻诉心声之后，今日嘅《早霸王》表白时段看来平淡好多，仲几有初恋feel。听众阿龙同心仪对象Carly都系做义工，相识一年多，阿龙同森美、小仪讲女方好文静又有爱心而且相处得好好，放假都会返公司约女方食饭，不过Carly有个奇怪习惯：“有样唔好，Whatsapp佢唔覆我、蓝剔我，已读不回或者不读不回。”森美疑惑：“咁奇怪？佢咁热心嘅人竟然对身边嘅人咁冷淡？好恐怖㖞！”小仪就话：“其实好多人都会唔记得嘅！”但未能解除森美疑虑：“已读不回代表对你好冷漠连朋友都不如㖞！”

森美继续追问：“有冇啲嘢都似触到底线呢？”阿龙称Carly曾有所暗示：“睇电影都有亲密嘢，佢挨埋嚟我捉住佢只手。”森美“哦”一声之后问：“你睇完戏唔继续拖住佢？”阿龙竟然答：“我衰啦我放开咗！”森美即刻好劳气：“你拖住𠮶下点解会放呢？你谂乜嘢呢？”阿龙：自己惊啰！”森美爆发：“拖住咗都惊？”

然后阿龙称拖过手之后Carly对佢态度亦有好转，会不时send生活相俾佢，食到好味鸡蛋仔又会提议阿龙下次去食，似乎好有机，连森美都话：“我觉得有信心㖞！”

于是森美、小仪就致电女主角Carly：“Carly有个男仔打嚟话钟意你暗恋你㖞！想唔想知系边个呀？”Carly答：“想呀！”森美继续问：“你身边有冇啲咁嘅男仔呀？”点知Carly咁答：“唔，我有男朋友个㖞！”小仪反应比较快：“下！你拍咗拖几耐呀？”森美连忙问：“𠮶个男仔系咩人嚟？”Carly好怕丑咁讲：“唔方便讲㖞！”森美同小仪即时静咗两秒，然后傻笑：“我想问你同你男朋友感情好好？”女方只答咗一个字：“唔。”就收咗线。

森美然后质问阿龙：“点呀！喂喂喂佢有男朋友你知唔知呀？”阿龙愈讲愈细声：“冇听佢讲过㖞！”森美唯有劝佢：“第一件事佢未结婚，之前𠮶啲结咗婚都有，有男朋友啫，未必一定长嘅！我唔系咒佢，但爱情系咁样嘅，静观其变啰！”阿龙收线后森美至松一口气：“又多一个原来唔知暗恋嘅人有男朋友，下个礼拜放假喇！”连续几次俾听众考起，森美真系要放假回下气喇！