【早霸王】人夫恋上已婚妇电台自白　森美：爱系冇错！不过关系错

森美、小仪嘅《早霸王》继之前同志“管家婆”同“劲过阿希”之后，今日再遇对手，一位结过婚嘅男听众“超人”打嚟向另一位已婚女告白，森美即时倒抽一口凉气，概叹：“时间系爱情嘅最大敌人呀！”

小仪放假，今朝嘅《早霸王》仍然有森美同西瓜留守，接听咗自称“超人”嘅听众来电，“超人”表示同意中人相识咗好多年，分开咗廿年之后喺一次聚会入面撞番，而大家都已经结咗婚，但喺暧暧昧昧嘅情况下喺埋咗一齐，森美听到呢句即刻倒抽咗一口凉气，“超人”继续讲：“但一直喺呢段时间入面所发生好多嘢都令到佢喺情绪崩溃，我改变咗佢一生。”森美就问佢：“𠮶阵时大家都结咗婚？”听众答：“系。”

森美尝试分析：“咁梗系大改变啦！可能佢由始至终对爱情都好单纯嘅！结咗婚就唔分开㗎喇，遇到你就梗系好大嘅冲击啦！咁两个都婚外情㖞呢啲真系。”森美又好同情咁话：“爱系冇错嘅！不过系关系错啫，令你哋辛苦，冇得返转头，但可以改变嘅，亦有人选择离婚，离婚唔系完全唔可以接受嘅事，不过牺牲好大，每个人改变会多好多，你两个系咪都决定唔离开另一半呢？”听众“超人”就答：“其实我已经离咗婚，但我唔想佢离婚。”原来“超人”已决定离开香港，等女方冷静下，森美听完松咗一口气，就话估唔到佢系打嚟同对方讲分手。

不过森美今次嘅处理方法同以往唔同，为避免女方身份曝光并冇直接打畀对方，而系由西瓜喺咪后打畀佢睇下对方愿唔愿意on air出街先，结果对方唔愿意开声，西瓜转达：“原来一直有听紧收音机，（西瓜模仿对方哽咽）佢ok呀！唔接上嚟喇！”森美亦好尊重女方，畀“超人”讲埋两句心声之后就总结话：“我依然坚持爱情系冇罪嘅，系点样相处啫！爱一个人永远永远爱佢，冇夫妻或情人关系可以永世相爱嘅！唔需要觉得唔开心！爱得及时好重要。”然后提番上次Lucy嘅故事：“咁多错爱嘅故事嘅！时间系爱情嘅最大敌人呀！”节目完结后我哋联络过森美，可惜佢未有回复。