吴若希公审老公后被指“泼妇骂街” 不忿反击︰边只眼见到我闹人
吴若希（Jinny）与老公何兆鸿（Alex）结婚多年，她不满老公近日忽然很积极车女同事返工，将对话截图放上网公审，闹爆：“你趷起条尾，都已经知你会做咩㗎！”虽然Alex解释自己只是要对方签MPF，又说：“我真系做嘢，我之前几年做垃圾做唔到嘢又闹，我而家做正经嘢都闹。”不过Jinny就反问：“我自己都有公司，都有帮人哋供MPF，我依家先知原来MPF需要老板亲自攞文件畀员工签。男人呢～就好得意嘅，身有屎𠮶阵呢，就会话自己已经好多嘢烦，怪番女人唔体谅佢！”
《01娱乐》昨午再联络Jinny时她仍未下火，以录音回复，语气继续单打老公，句句有骨说：“我都冇闹过佢，我点会怪责佢，好正常吖，人之常情，唔车个仔返学车条女返工好正常。个个老窦都咁做，个个老公都咁做。呢啲咁简单嘅嘢，佢边度有错啫？佢唔会错㗎，我唔会怪佢呀！”Alex“知衰”后亦表示会氹返老婆，做好跪键盘准备，赞Jinny为人大方好快就会消气，表示：“作为佢老公，佢的终生伴侣，明知道佢系一个凸嘅人，所以我会选择去做凹𠮶个。去慢慢思考应该去讲啲咩嘢、去做啲咩嘢去令佢开心番。有时放低不一定软弱，只系尊重老婆，尊重屋企。”Jinny知道老公向传媒耍冧，转发报道说：“好威威啊！唔单只系世纪好老板！仲可以做世纪好老公添啊！”
有网民就觉得，无论如何不满老公都好，身为公众人物都不应该将家事放上网，毕竟“家丑不出外传”，而骂战亦延展到另一战场Threads。Jinny昨日出Post说：“做咩姐～ 有班男人冲出黎话我怪老公～边有？我仲帮佢揾埋理由～何生心地善良～ 接送女下属上下班直头正常啦！ 请女同事返嚟做文书嘢，自己都要跟住去做咁亲力亲为，我一d怪责佢既意思都无啦～ 呢d动作一定唔系要flirt女下属！唔准你地误会何生！更加唔准你地话我责怪佢！我就系支持！先同你地讲第时见到何生系出面同条女一齐唔好误会～～～～”
有网民留言：“你老公肯娶你 已经系人类史上最伟大嘅事”，批评Jinny是“老泥妹”、“Joke of the day（是日笑话）”，她亦都有回复，问对方：“所以你系咪睇得好开心？”有人转发贴文指她是“泼妇骂街嘅典范”，Jinny当然不会忍，反问：“下？ 请问你边只眼见到我闹人？边一只字？定系你觉得佢车女下属返工唔啱？我觉得冇问题㖞～～”不过其实都有不少女性支持Jinny，认为发现老公与女同事行得太埋、不懂避嫌时，为人老婆者不应哑忍。