专访｜关心妍为慈善倒贴8年唔靠才俊老公 做阿四吸尘扑水一脚踢
网络能摧毁一个人，也可捧红一个人，关心妍（Jade）曾经身处其中，想必感受至深。但时代不同了、风向也不同了，今时今日上讨论区已经见不到什么潮文，反而见到“关家姐神级Live”“点解依啲歌手红唔起？”“摆喺呢几年女金都有”，坦言已经冇睇网上留言好耐的Jade笑得卡卡声，淡淡然说：“网民好可爱。”
摄影：陈顺祯
服装：Mo&Co. @Lane Crawford
形象：Vincent @ Vchapter
化妆：Davina
发型：Adrian @ salon_chemistry
就在两个月前，《叱咤》完结后记者见到一个Post“上叱咤唱歌基本水准起码要系咁”，一入去已经见到Jade第一次、也是唯一一次攞叱咤奖的片段，那是20年前的事了，她得到“叱咤乐坛生力军女歌手金奖”，唱的是《你有心》，与她有关的留言清一色有赞冇弹，哗！这是我熟悉的连登吗？
冇睇网上留言好多年 相信会雨过天青
后来，知道有机会见到Jade，再爬文一次，心想一定要跟她分享，于是在访问中把留言读给她听，“上唔到一线好可惜”“关家姐屈到癫”“关家姐真系超水准发挥 J死人”“几时再出歌？香港需要呢啲清泉”，她哈哈大笑说：“我觉得网民好可爱，好有娱乐性。”原以为反应会再大一点，但，也只是这样。咦，难道不觉得终于吐了一口乌气吗？不过想想也是，早年受尽网络攻击的Jade或许早已刀枪不入，对别人的评论不会有太大情绪起伏。
“潮文事件”原来已是19年前的事，自此Jade冇睇留言好多年，“你要有足够强大先可以睇，话唔介意，但系睇得多都难搞嘅，所以我习惯唔睇。以前喺留言区一定系一面倒闹你，唔系关家姐就关菊英㗎喇，你都会同自己讲‘唔好睇喇，唔好睇喇～’但依家佢赞返你，咁咪‘多谢你呀’，努力原来人系睇到，可能有段时间大家都误会咗你，依家雨过天青咪好啰，人生都系咁。”
当然，她也是曾经历尽风霜，今日才可如此云淡风轻，“关家姐经历咁多年，到今日我揾自己方法，唔会畀佢整到我自己Lost！”Jade深信一切都会过，疫情也好、谣言也罢，或者猜不到是何年何月，然而总有一日会过去，“当你真系冇做或者唔系一个咁嘅人，冇得呃，尤其依家个时代，人哋好多蛛丝马迹去睇你系咩人，Artist透明度高到不得了，所以都系做返自己。”
吁大家别被评论摧毁 开演唱会互相燃亮
“清者自清”讲就易，但许多事情或者只得等待时间去证明、等它过去，讲到半路Jade再分享自己近年忙著“妍亮生命慈善基金”的工作，接触的情绪病患者中，病因很多确实与手机内的某些评论有关，她的看法是：“唔可以太过在意人哋睇法，人哋睇法真系会Destroy咗你，真系唔值得。人哋讲嘅嘢，系定唔系对你个意义大唔大呢？其实唔系特别大，你揾到自己要做嘅嘢，知佢唔会伤到你，用你自己生命去鼓励人，而唔系去畀人击倒。”
既然现在有一班人“忏悔”以前不懂珍惜关家姐，她又有冇想跟网民讲些什么，“如果你觉得当初冇撑我，咁你今日嚟帮下我做呢个慈善Show，帮我搞掂啲飞佢！”
又开Show？上年6月Jade才开完《关心妍Jade Kwan约20周年演唱会》，事隔大半年再返红馆，她讲明不是Part 2，而是完全不同的慈善演唱会，原定两年后试行，谁知入纸两个月，忽然好似申请信用卡的“特快批核”那样，批了，入纸成功，4月就开Show。演唱会叫《关心妍Shine妍亮福音慈善演唱会》，她说：“Show个名叫‘Shine’嘛，成个show好希望可以互相燃亮大家生命，我燃亮你，你燃亮身边嘅人，大家延续落去，燃点返成个香港人嘅火。”
慈善基金险执笠 仍赠100万飞予有需要人士
Jade说今次演唱会有1百万飞钱会免费赠予低收入家庭、基层家庭、长期病患者和学生，其慈善基金营运8年，一直帮助有情绪问题或过度活跃症的低收入家庭。演唱会目的确实很有意义，可是“福音慈善演唱会”未必人人接受，以往就曾有歌手被乐迷批评演唱会“讲太多耶稣”，不过Jade就叫大家放心，强调不是做布道会，“我系希望做一个精彩嘅演唱会，里面有福音嘅元素啫，但都有好多流行曲嘅，大家可以放心。我除咗惨歌，都唱好多福音歌、有爱嘅歌、正面嘅歌，有人话上次无唱，今次可以满足返。”
做慈善固然不为赚钱，但Jade却直情年年倒贴，拍广告、做Show、教唱歌赚回来的收入皆进贡慈善基金，每赚到钱就搞一个新的慈善Project，希望自负盈亏，为有问题的小朋友承担音乐治疗的高昂费用。外界可能以为她嫁了“金融才子”老公就不愁经济，不过原来早前慈善基金险些倒闭、冇钱交租，“疫情咁多嘢执笠，慈善基金更加执先添啦！”
Jade自言基金冇请人，全部都是义工，无需缴行政费已是不幸中之大幸，艰难时期唯有靠大家再做多些，她当然以身作则，“我返公司都系一脚踢，吸尘、执嘢、做阿四全部都系我自己做晒，悭得一蚊得一蚊啰。”更庆幸的是，那阵子突然有广告商找她拍广告，终于成功扑水交租，又挨过了一劫。
歌唱事业不再是唯一 找到生命意义
撰稿之日，Jade的新歌《再见关惠文》刚好推出，关惠文是谁？就是Jade的本名呀，大概她已跟过去的自己道别，用《圣经》的话语来说，“旧事已过，都变成新的了。”犹记得有报道说她曾讲过对颁奖礼失望，不会再出席，然而现在又有网民希望推她上叱咤台，既然又有歌派台，如果有机会，她又会不会想参与呢？“依家个心态真系唔同以前，以前事业系唯一，但依家我嘅事业唔系我嘅唯一，我唯一系我生命嘅meaning，所以依家都好随心，钟意好自由去生活嘅自己，好开心。”
她坦言现时处于最满足的状态，因为每日睁开眼知道自己的人生意义，以前唱歌不是冇意义，但可能一直努力做做做，却睇不到成果，付出与回报不对等；反而做慈善基金，见到覆盖率、受惠人士持续增加，带给她莫大满足感。尽管慈善基金曾陷入财困，以新方式搞Show又有许多未知、筹备时间又仓卒，但Jade还是决意搏尽，“有时你要勇敢去试、去搏，哪怕今次可能唔成功，都要跳出你Comfort Zone。譬如我以前觉得净系可以做歌手，唔可以跳出去做任何嘢，但原来唔系，人生唔系净系得一样嘢，只要你够胆跳出一个地方，真系会睇到唔同境界！”
按图睇更多关心妍靓相：