【我是现场】许廷铿盼与per se以乐队名义出歌：喺返呢个台唱新歌

本地演唱会系列“我是现场”第一场表演在上周六（26/6）经已完满结束，当晚许廷铿（Alfred）与组合per se组成一夜限定乐队“Negative Ends……。”，先后送上《无门》、《停半分钟听一阙歌》、《守望》、《粉碎糖果屋》、《你在我在》等作品，台下观众反应炽热，在Encore环节过后仍未愿意离开，更纷纷走到台前，最后三人走到台上，不但演绎《不日之约》，更再度演绎《无力感》X《天空塌下前》，观众才愿意离开会场。

Alfred首次要两度Encore

及后记者走到后台，第一时间了解对这次演唱会的感受。Alfred主动谈起下台后第一时间的感受，他从未想过在第一次Encore后需要再回到台上：“其实系第一次做完骚之后要两度Encore，今次仲要玩到冇嘢玩，要唱返个骚唱过嘅歌，但系大家嘅反应令我觉得，我哋呢个乐队都好成功，似乎仲有得继续做。其实我喺前一日总彩排嘅时候已经同佢哋讲，话我已经有啲唔舍得。我觉得观众令我哋嘅肾上腺素飙升，即系本身彩排嘅时候有啲歌会觉得好难玩，好吃力，无论系对弹、对唱都系，但系做完骚先发现，原来可以唱多几首。”

在旁的Sandy（叶蔚菁）也认同：“好似冇咗一夜限定嘅感觉，好似好期待呢个骚嘅发生，但系都好唔舍得，今次好快就完咗。本身我觉得今次预备咗好多歌，成廿几首，但系Encore之前先醒起，点解咁快就玩完嘅？”而结他手Stephen（莫善祺）也非常享受第二次Encore的表演：“本身第一次Encore就预备咗嘅，所以完咗之后落台，我就好想再有机会弹，一齐继续再玩，好彩真系有呢个机会，好开心。”

数到当晚反应最好的歌曲，相信不少人都会认为是《无力感》X《天空塌下前》的改编版，原来这也是Alfred的私心推介：“呢首系我私心想玩嘅，第一次彩排已经夹过，已经起晒鸡皮。”他坦言自己和per se的观众群截然不同，不过“我是现场”正好让各自的歌迷认识更多对方推出的作品：“其实今次我都认识多咗per se嘅音乐，系可以介绍多啲畀我嘅乐迷认识，我都希望你哋（per se）嘅乐迷，之后整歌单都会有许廷铿嘅歌。”

per se赞Alfred彩排够认真

三人会如何评价当晚表现？Alfred认为Stephen开始更愿意与其他表演者或观众交流：“从我一开始认识佢都知佢系比较内敛，但系头先我觉得自己同佢有好好嘅眼神交流。我喺台上面有讲过佢嘅反应，呢个其实真系已经释放咗出嚟嘅Stephen，虽然只系‘嗯’咗一下，但系已经令我好清楚佢系非常投入。净系呢方面我就已经畀Stephen满分。”

Stephen认为Sandy在表演中成功脱离舒适圈：“我同Sandy夹咗咁耐，不论系per se定系之前其他乐队都好，今次系第一次唔系乐器面前唱歌。我一开始识佢嘅时候，佢未必当自己系主音，未必敢放低佢自己最拿手嘅琴，呢个对佢嚟讲真系一个突破。”

至于Sandy不论台上抑或彩排，都给予Alfred满分：“系比满分再高啲𠮶只！佢本身唱歌已经好掂，不过今次仲要加一啲合成器，我知道佢有好多嘢要处理，因为本身我系弹琴，清楚𠮶一刻系有好多嘢要谂，但系佢表现到好似完全驾驭到。而佢喺彩排𠮶阵都畀足100%嘅力，好认真，我本身想彩排𠮶阵留力，不过见到佢咁用力，我都唔留力啦，照做埋一份。同埋佢真系好似一个大哥哥咁照顾我哋，所以真系好感动。”

或再以乐队名义出歌

per se被问到12月的演唱会是否再邀请Alfred担任嘉宾，Stephen指一切细节尚待稍后时间落实：“因为我哋呢场演唱会都放咗200%嘅力落去，所以之后先再决定。”在旁的Alfred就期待能与per se再续前缘：“咁啦，如果新碟其中一首歌可以用返‘Negative ends……。’嘅名义去做，我觉得要喺返呢个台唱返呢首歌。”Alfred坦言对per se会否有足够时间筹备个唱感到担忧，因此感激对方能在这段时间依旧在彩排中全力以赴：“我哋作为艺人，好清楚每一次演唱会完咗之后，下一次就要再进步。其实今次𠮶骚嘅门槛定得太高，观众嘅反应话畀你知系支持你之余，亦都有一种期待，所以离下一个骚其实唔系好多时间，要开始准备啦！我无论点都会支持per se。”

Alfred也指今次是自己作为独立歌手后一个重要里程碑：“今次我将注码投资咗喺per se同‘Negative ends……。’身上，由第一日开始感受佢哋嘅时候，我觉得系揾啱伙伴一齐做。其实我系第一次跻身呢一个范畴，之前我都系公司旗下嘅歌手，原来所谓‘独立’，可能有个‘独’字，会有一种孤独嘅感觉，但系‘独立’唔系代表紧‘孤独’，我觉得今次系帮我冲破咗一啲以前会好惊嘅嘢，原来根本唔需要惊。”

点击图辑，重温当晚精彩演出：

《我是现场 音乐会 001》相关文章：

【专访】许廷铿认出骚靠现场观众推动：近年先发现呢样嘢唔系恒常

【专访】许廷铿认与per se有情意结：indie歌手好值得大家听到

我是现场︱许廷铿自认眼浅一见到观众即哽咽：系因为M Come！

我是现场︱per se台上宣布12月再开骚　许廷铿预告新歌即将面世

【我是现场】许廷铿未决定做《造星IV》导师：谂紧自己够唔够资格