【专访】许廷铿认出骚靠现场观众推动：近年先发现呢样嘢唔系恒常
踏入2021年，歌手除了密密制作新歌，亦陆续举行大大小小的演唱会与乐迷见面，而全新本地演唱会系列《我是现场》也将于今年6月正式启动，为疫情下停滞多时的本地演唱会市场注入全新活力，同时也为热爱现场音乐演出的一众乐迷送上一连8场精湛演出。
为《我是现场》打头阵的是许廷铿（Alfred）和组合per se，他们将于6月26日假旺角麦花臣场馆献唱。两个音乐单位将以一夜限定乐队“Negative Ends……。”与乐迷见面，谈到在新常态下能顺利举行实体骚，三人均深深体会现场观众对歌手演出的重要性。
撰文：刘传谦
摄影：陈顺祯
队名揭许廷铿per se音乐共通点
“Negative Ends……。”这个名字是由三人一起构思，当中包含两张大碟的名字，包括Alfred上年推出的《Negative》和per se在2018年推出的《ends》。Sandy（叶蔚菁）得悉Alfred也有组乐队经验，在音乐总监CM的建议下，决定尝试在这个舞台组成期间限定的新乐队：“一开始CM叫我哋夹咗个band名先，我本身就谂‘吓？真系要咁认真夹个名出嚟？’但系一出咗band名，当中大家知道咗各自嘅喜好，呢一件事可以点jam出嚟，就冇咗之前𠮶种拘谨。”Alfred也补充：“𠮶阵我都心谂‘喂呀！咁多人夹到期唔容易㗎！’原来呢个先系重点，我哋攞返以前夹过嘅band名，讲返以前一啲好钟意嘅乐队，呢件事好似好表面，纯粹谂一个好有型嘅band名，但系呢样嘢可以令我哋今次合作有一种定性。”
乐队以各自音乐作品命名，看似顺理成章，但Alfred在名字当中找到一些共通点：“我有一首歌叫《……》，佢哋都有一首英文歌叫《。》，原来我哋都有啲歌系咁翘口巉手。我有好多朋友同我讲‘好钟意听你《Negative》成只碟最尾𠮶首歌，其实点读㗎？’我答话叫佢做‘省略号’。”在旁的Stephen（莫善祺）也解答Alfred对《。》的疑问：“其实有好多个名，‘句号’、‘fullstop’、‘ends’，呢三个名都有人咁叫。”
01空间｜FWD 富卫保险呈献 “我是现场” 音乐会001 许廷铿 & per se - 网上直播门票
买唔到飞睇 许廷铿 & per se 唔使担心，“01空间”现推出网上直播门票，畀大家安坐家中都可以睇到呢个一夜限定嘅演出，我哋到时见啦！🎧#直击现场空间
🎤立即购买网上直播门票 👉🏻 https://bit.ly/3gO4jgJ 🎹
3月录《Chill Club》结缘
回顾三人结缘的经过，原来3月录影的其中一集《Chill Club》，才是他们第一次见面。当时Alfred唱出该集最后一首歌《无力感》，而per se则在旁等待拍摄结尾，Sandy大赞Alfred唱功了得：“𠮶阵其实只系行埋去就可以，当时冇正式倾过计，但系一听到之后就觉得，佢真系坚㗎㖞！”此时Alfred笑指：可能我系播紧MMM（Music mixed mastered，意指一首完整的成品音乐）呢？”Sandy即指：“都系，始终都系一样嘅！”
Stephen坦言，自己从这次演出得到启发：“𠮶次因为某啲原因，我记得你系唱咗4次，我同Sandy都系第一次听，觉得你唱得好好，但系当晚连续唱4次都可以一模一样，完全冇瑕疵，我就觉得好惊讶（mind-blown），之后𠮶个礼拜就做多啲运动，练多啲唱歌。（Alfred：我个样似系有做开运动咩？）哈哈，其实我系比较少听男歌手唱歌嘅，但系𠮶次就咁听一个短版，就突然间揾到一股动力，好感染到我。”
不过Alfred忆起这段往事，却感到有点尴尬：“我谂住净系录首歌，点止原来系全部唔同嘅单位都等紧我唱完，之后就埋嚟收尾。你知阻人收工都系一件唔系咁好嘅事嚟，所以当下……我明你（Stephen）觉得我唱得好稳定，但系我内心系好惊，只要我唱好佢，大家都可以收工。”
重拾夹band新鲜感
问到三人合作的点滴，Alfred直言是种崭新、愉快的体验，他坦言自己除不时重温彩排片段外，亦非常享受彩排期间的创作成果：“呢啲真系创作嚟，由一啲我哋原本有嘅歌曲同埋元素，其实喺某程度上系赋予紧一种新嘅灵魂。原来有一啲平时已经唱惯唱熟嘅歌，我交畀另外两位帮我做编曲，出嚟嘅感觉系可以好唔同。我突然间觉得佢哋唔再系伴奏，而系Sandy用钢琴发声，Stephen用结他弹到一种好唔同嘅氛围出嚟，于是我哋三个就变咗全部都系主音，只不过我系用人声，呢个就系‘Negative ends……。’嘅状态。”
Stephen认为，虽然per se过往的演唱会彩排方式与今次以jaming为主相若，但仍觉得整个合作过程新颖：“其实我哋都有好多年冇夹过一队新band，我都从来未试过同男声夹band，永远如果有三个人一齐夹都系女声，例如Serrini同埋泳儿。对我嚟讲，今次系令我记得返，原来夹band系一件咁正嘅事。同一时间都会有一啲新嘅嘢发生，因为Alfred除咗主唱，亦都会即时谂到一啲和音，而呢啲和音Sandy系唔会谂到，因为佢系度紧一啲偏高嘅和音。”Alfred也想起第一次彩排时编排和音的点滴：“其实我唔系谂出嚟，系感觉嚟㗎，即刻嚟先会有𠮶样嘢。其实《我是现场》就系讲紧呢啲元素，𠮶件事系好玩嘅，依家讲起都有啲起鸡皮添！”