【容祖儿演唱会】草蜢现身合唱撑Joey　蔡一杰卖甩团员开个人骚！

容祖儿《PRETTY CRAZY》红馆演唱会休业一日，Joey差满电后强势回归，状态大勇，但大头虾性格依旧，在演唱会开始不久后，就和歌迷分享当晚发生的虾碌事：“今日出场前，我都唔知点解自己会反锁咗自己喺厕所，要人嚟我先开到门，你哋要叫大声啲，畀多啲正能量我，去赶走啲负能量！”全场歌迷立刻尖叫到快要掀起红馆屋顶，直至嘉宾环节时，她与草蜢的互动再次让歌迷笑声不断，看来Joey才是真正的正能量发电机！

“连日嚟有好多唔同嘅歌手出现，有唔同嘅职业，有农夫𠮶啲啦，咁今日系昆虫类嚟嘅！”虽然因为嘉宾外单已外泄，但歌迷依然畀足面落力欢呼，Joey噗哧一笑后续言：“有三只，好犀利㗎佢哋！讲跳舞，一个跳到开学校啦、有个跳舞跳到头发长过我啦、有个跳舞跳到扭下拧下…迟啲仲会开骚添！大家都知道边个啦系咪呀？”便立刻唱起《失乐园》，邀请草蜢出场一同合唱。

歌毕，Joey马上向草蜢三子连声道谢和逐个拥抱，并恭喜蔡一杰，让他惊喜一问：“你恭喜我啲咩呀？”Joey想也不用想便回答他：“恭喜你开骚！”苏志威和蔡一智当然不错过机会，马上在台上争取机会，帮好兄弟落力宣传，Joey忍不住搭话：“我哋一定会支持你嘅，但系我想问下，即系…有冇兴趣请嘉宾呀？因为连日嚟我碌咗咁多人情卡，我谂要还嘅！你演唱会需唔需要嘉宾呢？”这个主动请缨的提议让蔡一杰措手不及，他带点迂回地回话：“有一个空缺，你想唔想玩一啲另类啲嘅嘢？”Joey便边跳边猜：“唔会系辣身舞挂？”蔡一杰便笑着揭盅：“和音够特别啦！”让Joey马上回答：“和音呀？和音我就唔系熟啦！不过我头先有学到啰。”他便带点尴尬的说：“好呀…我谂下！”然后惊觉回应似拒绝Joey，便马上出言补救：“我唔系推你嘅意思呀！”好兄弟当然不放过补刀机会，苏志威立刻捉紧机会说：“你竟然喺佢主场推佢？”台上台下看到蔡一杰惊慌失措都忍不住大笑，他紧张得拉起Joey的手，认真的承诺：“我绝对系欢迎㗎！咁记住嚟睇啦㖞，有祖儿㗎㖞！我唔好意思呀，你天后嚟㗎嘛！”Joey贴心回应：“真系冇所谓㗎！你咁难得开演唱会！而且你估系小嘢㗎，你系Diva！”

苏志威继续玩得开心，整蛊兄弟：“喂，佢话好难得甩低我哋两个呀，佢自己去玩呀！”Joey和应卖口乖：“梗系啦，你又咁忙，又开公司、又帮我整咁多靓嘢（衫）、你老婆系全港最红KOL㖞，你都可以唔使做啦！”此时，蔡一杰默默走到Joey身边，在话缝间插话：“哇，你今日件衫好靓㖞！好似鸵鸟毛咁！”Joey揈住讲：“系呀，衬返你哋呀嘛，有动感啲！”并邀请蔡一杰亲手摸衫，感受一下是否鸵鸟毛，让蔡一杰无奈说：“我摸边到啫！你咁样队埋嚟！”Joey便干笑可爱地回答：“我哋有乜所谓，你想摸边度？”说到这里，歌迷已经笑声不绝，让一直被冷落在一旁的苏志威酸酸的说：“你哋就有本钱打情骂俏，我同佢（蔡一智）就唔可以做啲咁嘅嘢…”

在欢笑声中，Joey突然想起蔡一智未有加入对话，便对他说：“唔系呀，阿智都未讲嘢，通常阿智讲啲嘢系最有智慧嘅！”蔡一智想想，便突然分享与Joey的行山经历：“其实呢，我有一次就同祖儿去行山，话说𠮶条路线图就好崎岖嘅，咁就估唔到佢落到去一条马路嘅中间，我𠮶阵都有少少担心，因为天后嚟㗎嘛！点知喺马路嘅时候呢，佢突然间雀跃起上嚟，系单脚跳下跳下咁行添，有巴士经过嘅时候呢，佢仲好开心话‘好开心呀！我咁大个女从来都未试过喺马路度行㗎！’，我真系觉得你好Crazy啰，我几惊你会畀啲巴士撞到！”说罢，他们便再合唱《限时专送ABC》。