TVB完约陷入迷茫期 康子妮成为容祖儿演唱会御用和音全靠自学！
成就一个演唱需要无上限的注入心血体力，以今次容祖儿《PRETTY CRAZY》演唱会为例，为了打造出视觉、听觉的华丽舞台效果，不但邀请了国际舞台设计师Es Devlin，连幕后音乐制作班底也卧虎藏龙。以何秉舜为音乐总监的团队下，其中在和音歌手团队中便能找到一位熟悉的身影——康子妮，可能大家对她的认识只停留于主持人、演员、或林晓峰太太的身份，却不知道藏在这些背后，真实的她是一个从小便喜欢在音乐世界中探索的冒险者，这次读者能从Joey演唱会这扇华丽的随意门作入口，游历康子妮用音符堆砌的一部份人生。
台前优雅精彩 台下“倒泻箩蟹”
Joey出道20年，累积了多首经典歌曲，虽然开骚前已拟定好歌单，却无法阻挡心血来潮。“有时会完骚当晚收到新歌单，有时系Joey突然想唱，有时系嘉宾改歌，𠮶啲歌可能系我哋未练过，亦都可能冇谱，如果何秉舜有旧谱嘅佢会畀我哋，唔系嘅好彩我地都有一个高手，都系和音歌手成员之一嘅Perl，佢会负责写和音谱，咁我哋就不停咁听同练。”每一刻都系考牌时间，她们在演唱会当天正式彩排一次后，下一次上台便是正式表演。
帮Joey和音难度高，她透露幸好团员大方教导不私藏：“今次我哋要冲出去同Joey一齐跳，咁我哋要背歌词，佢哋教我真系要自己背默写返一次出嚟，咁先可以真系记实歌词。Angelita佢其实唔系专做和音，佢都系一位好出色嘅歌手，佢教我录起自己唱嘅和音，再不停咁听，就可以更加熟悉自己唱嘅部份。”
旁人都以为“玩票性质”客串一下
康子妮的第一笔演唱会履历从郑伊健《岁月友情》世界巡回演唱会开始，“本身同Punk仔（陈光荣）都系朋友，佢一直都有揾我唱下Demo、录下Flute嘅，所以佢就知道我识吹下长笛同唱下歌咁，但你话真系唱和音就好少，因为我系唔识睇和音谱嘅。”和音乐谱是数目字乐谱，和乐手看的五线乐谱是完全不同。“咁啱当时郑伊健隔咗好多年再开骚，PUNK仔𠮶阵揾班底，佢就揾咗我，我就系咁加入咗郑伊健嘅和音团队。”她指，当时很多人以为自己是客串参与，但她一直都是十分认真看待这份工作。
当你打从心底喜欢一件事时，你自然愿意会愿意为它付出和牺牲，当年她为了跟随郑伊健演唱会巡演，不惜牺牲自己的休息时间，只因每个周末都要到处飞，平日又要兼顾家庭生活，只能珍惜用餐和交通时间和儿子沟通，但如果重来一次，她直言仍会坚持当初选择：“当时仔仔嘅成绩系差啲，但呢啲系一定会有嘅牺牲。佢哋男仔嚟㗎嘛，妈妈唔喺身边佢地仲可以学识独立，仲记得有次佢自己搭车去练波，平时有我车，咁𠮶次佢带唔够钱，佢同我讲佢喺车站问人借咗2蚊，都系一个好嘅经历嚟嘅！”而且自己在旅途当中亦累积了很多经验，又有一群支持自己的歌迷：“工作对我嚟讲都好重要，再拣多次我都会去做Tour，即使要飞到只狗咁，我都真系好钟意！”
毕业于音乐系 笑言“依家做嘅嘢同读嘅完全唔同”
康子妮音乐才华洋溢，但父母对于女儿要全心投入音乐，甚至远赴加拿大读音乐，他们以未来前途为考量下并不支持：“其实佢哋都系担心我，不过后尾佢哋都好支持我，但我记得有一年暑假我返香港玩，我以为我爸带我去通利琴行买嘢畀我，咁我好开心啦，点知佢同我讲，第日你毕业就系喺度卖琴㗎咋…几失望，不过谂返起都觉得好好笑！”
毕业于多伦多大学音乐系，对于现时的工作应是得心应手？她笑着说不，并解释从前学习的是钢琴演奏，与工作内容完全没有直接关系，更抛出一个惊人的消息：“以前细个有个邻居，我哋成日都会一齐返学放学，有日我见佢拎住袋黑色嘢返屋企，就问佢咩嚟，佢话Flute啰！然后我就问佢借嚟玩，佢仲借埋书畀我添！”原来在万人空巷中演奏的长笛是自学技能，她续言：“因为𠮶阵仲未有YouTube，我系睇书里面啲图去摸索个嘴型去吹，但我唔识用气，一路都用吹蜡烛嘅气量去吹，吹到差啲晕！但都系用尽力都吹唔出声，原来系你吹完长笛会用一枝棒棒去清理里面啲口水㗎嘛，后尾先知原来系我冇拎返出嚟。”她谦虚指自己因自学关系，所以基本功未有练好，但兴幸在Joey演唱会遇上长笛高手Perl，康子妮不时向对方讨教，不断调整口型、气量、音色，以精进自己的技巧。
曾是主持又是演员 迷茫后终回归音乐
当年在加拿大完成学业回港，在郑敬基的介绍下，曾与多位音乐人和唱片公司见面和试音，却无奈因回港后未能适应气候，断断续续病了一年，当时她同时于西崎崇子的Naxos Music Centre教音乐，其后辗转之下便与TVB签约，打算见步行步再寻找唱歌机会，却从此开拓了主持和演员之路。
显然康子妮与音乐的羁绊之深，后来在她与TVB完约陷入迷茫期时，认识了音乐路上的其中一位导师Allan Ip，尽管知道她并不懂得写谱，仍愿意给予机会和时间让她在学习中完全编谱，一个月后她终于完成了她的第一本琴谱作品《Classic Children’s Song》。其后，她坦言自己的编谱技巧得以进步升级，全因在“全港公开学生音乐比赛—流行曲组别”担任评审和编曲中顿悟：“市面上好多流行曲谱都系Melody再加伴奏，佢唔会加啲技巧嘢上去，但个比赛令我开始留意，会加返啲编曲嘢上去，令件事分到level，同一首歌可以整到佢好易，或者超级难都得。”后来，她在陈光荣招揽下成为郑伊健演唱会的和音，更认识了两位志同道合的好朋友——李端娴（Veronica）和田嘉年（Grace）。
“曳”住玩广东歌 Arm Charm不随波逐流
在演唱会外，Veronica、Grace和康子妮于电影配乐中再次交手，那次合作改编at17的《The Best Is Yet To Come》，“𠮶次之后，我哋都觉得好有Feel，就喺V记嘅recruit下组成咗Arm Charm，主要系想做港味啲歌，玩多啲广东歌。”三人各有各忙，只能偶尔聚在一起Project式玩音乐，但她满足的说：“我哋做好多Cover改编嘢同Mini Show，同时我哋又好怕闷㖞，所以喺改编嘅时候都会加入好多得意、另类嘅元素，好似邓丽君首《偿还》，我哋改咗做Acapella，又加入咗James Bond嘅音乐感觉，但大前题都系要keep住地道。”再听，其实《The Best Is Yet To Come》最后都改编成鬼片女声效果，让旧歌新编重新听一遍也能充满玩味和新鲜感。