【专访】卢冠廷“开班授徒”话你知：电影配乐深奥过流行曲好多！

称呼卢冠廷(LoLo)为“行走的音乐百科全书”，相信也没有人会反对。他对音乐的理解，通透得犹如“音乐Google Map”，精准而且一步到位。与其说笔者跟LoLo做访问，倒不如说LoLo为笔者上一课“音乐精读班”更贴切。
各位同学，准备好上堂未？
摄影：江智骞

电影配乐 VS 流行曲创作？

相信不少人与笔者一样，都是听流行曲长大，亦大概知道有时候简单几个和弦就足建构一首流行曲；那电影配乐又要如何处理？是否一味符合画面需要就可以，背后运作“冇咁有章法”？岂料答案完全相反。

LoLo认真说：“电影配乐要着重乜嘢Scale(音阶)俾乜嘢mood你！电影配乐嘅Chord(和弦)系可以深过你Pop Music嘅Chord好多！”话音一落，LoLo随即举出连串例子，果然是“行走的音乐百科全书”。

上堂之前，大家可以重温之前两篇报道，了解一下LoLo做电影配乐的苦与乐

【专访】卢冠廷“奇招”成配乐大师 荷里活作曲家冇佢咁“巴闭”

【专访】神曲《一生所爱》仲有得改 卢冠廷：再做流嘢对自己唔住

到底电影配乐用到的和弦，比流行曲所用的有多深奥？LoLo慢慢解释：“例如Scary(惊栗) Chord你要点做吖？要Augmented chord加个Major 7th，普通人系唔会㗎嘛，但用喺电影就可以出嚟，你先有𠮶个mood！实情比起Pop Music系深奥好多。”他续说：“再讲下紧张感觉要有咩元素吖？要有Flat 9 ，任何音乐harmonize个Flat 9th都会惊惊地，因为唔harmonize吖嘛。”

注：
Augmented Chord 组成音为：I - III - #V ，如加上Major 7th，则变成：I - III - #V - VII。
以C Augmented Chord 为例，加上Major 7th，组成音则变成：C - E - G# - B。

讲完Chord当然要讲下Scale(音阶)，有别于大家都识唱的“Do Re Mi”，要熟悉其他音谐才能准确地做出想营造的效果：“例如卡通片入面、要上天堂、又或者好惊讶嘅场面，就要用Whole Tone Scale，咁先俾到去咗另一个世界嘅感觉你。呢啲嘢一定要知，唔可以用Major Scale，冇mood㗎！”

注：Whole Tone Scale(全音音阶)，以C Key为例，音程为：C - D - E - F# - G# -A# - C

“John Williams写嘅《Star Wars》配乐点解咁激昂？一定要用Lydian Scale！”

注：以C Lydian Scale为例，音程为：C - D - E - F# - G - A - B - C 

“仲有啲一听就有古代感觉嘅，一定要用Phrygian scale。全部都要知㗎！如果唔系你做唔到真正嘅电影音乐！”

注：以C Phrygian Scale为例，音程为：C - Db - Eb - F - G - Ab - Bb - C

Rap Music令新一代唔识写好旋律？

分享完一些“武功心法”，到底LoLo对现时的主流音乐又有何看法？加上近年“抄歌风波”频生，是否意味着好的旋律已经“饱和”？LoLo斩钉截铁说：“唔会㗎！错误晒！”

音乐三大元素：Rhythm(节奏)、Harmony(和声)、Melody(旋律)

LoLo解释：“80年代开始用电脑制作音乐，有Loop(反复段落)出现，令好多人唔需要识乐器，都可以叫自己做Composer(作曲家)，因为有个backing俾咗佢，所以作出嚟嘅音乐‘冚澎冷’都一样，开始冇感觉。”他续说：“到90年代Rap Music出现，令大家忽略组成音乐其中一个重要元素—Melody(旋律)，令依家全人类啲后生想作到啲好嘅melody真系难过登天呀！”虽然LoLo认为现时较少优美的旋律出现，不过《大娱乐家》的配乐却令他喜出望外，大家有兴趣亦不妨欣赏一下。

要“搭通到天地线”先可以感动人

未知大家有否这样一个经验，在看演唱会或歌唱节目时，某些歌手“高音甜、中音准、低音劲”，又或者“巨肺”飙高音，你对他的技术为之赞叹，却没有为之动容。LoLo一语道破：“因为佢唱歌唔系from the heart。”他解释：“因为一个歌手就算技巧有晒都好，都系个脑意识嘅嘢，任何装饰，即使佢点样完美，人哋感动唔到㗎，因为系假㗎！但如果你from the heart，系潜意识嘅嘢，呢样嘢先可以感动到人，搭通到天地线。”

LoLo曾与一些后辈分享，要求他们“唔好谂”，他说：“你一谂就系意识，你会会谂下点样装饰个音，唱得长啲、重啲，咁就死喇，变咗完全冇感觉！First take系最好㗎，个个都系！”他亦指出，这正正是某些歌手唱Live的表现比录音室版本更好，因为机会只得一次，迫使人集中出尽全力去演出。

要做到“从心出发”的确知易行难，LoLo亦笑言：“其实一啲人系知道㗎，但系佢都唔理，系都要‘谂住’，个个都系咁㗎㖞！冇办法，哈哈！”