【专访】配乐大师遇上神级导演 卢冠廷被玩谢：唔识弹琴又Ban桥
卢冠廷(人称LoLo)可谓香港乐坛的传奇人物，纵横乐坛三十多年，笔下写过金曲无数。于90年代淡出，至2015年重出江湖，LoLo如侠客一样，隐居闭关过后，再出手定一鸣惊人。今年LoLo炮制新专辑《Movie To Music》，从以往写下的过百出电影配乐之中，挑选十首重新改编，歌曲同样以电影感为主轴，但用上不同风格诠释，突破乐迷的想像空间。
在一片“冇歌好听”、“我钟意听K-Pop”的声音之中，LoLo却要反其道而行：“年纪已经有番咁上下，唔可以再做啲‘流嘢’出嚟，唔单止对自己唔住，更加对乐迷唔住！”
摄影：江智骞
写出《赌神》因为够“巴闭”？
可能大家未必知道，《赌神》的配乐其实也是出自LoLo手笔，当中周润发出场的一段激昂的旋律街知巷闻，到底当时灵感从何以来？LoLo说：“要知道中国人嘅细胞喺边到，就系‘巴闭’！”
他解释：“巴闭呢样嘢，外国系冇㗎，佢哋比较含蓄啲。中国人会烧炮仗，又有样乐器叫“啲打”(唢呐)，一吹就隔篱村都听到，总之就巴闭啦。‘赌神’一出嚟个画面唔巴闭系搞唔掂，而西方乐器最巴闭就系Brass(铜管乐器)，所以呢段音乐好自动就‘噗’一声喺我脑面出嚟，好快㗎！”他又提到，曾有一位名导演，即使邀请荷里活作曲家做配乐，也没法做出那“巴闭”的感觉，的确是“细胞”的问题。
将《天下无敌》套番落《赌神》嘅画面一样有Feel！
做电影配乐，客人几Bad Taste都要做
做电影配乐跟广告、设计一样，客户Ban桥是常识吧，LoLo笑言：“我哋系service music，你要serve个client，佢要乜就要俾乜佢，几bad taste都冇办法，为两餐嘛！”
音乐大师也有苦恼，曾被另一位大师ban桥ban到晕，LoLo没好气说：“呢个人叫徐克！佢唔识弹琴添啦！”
只听这句都知“湿滞”，到底是怎样一个故事？LoLo续说：“当年我做咗个Orchestration(管弦编曲)，千军万马咁好劲嘅。点知佢话个速度快过头唔得㖞，然后佢自己揾个琴嚟弹，仲要佢唔识弹㗎添！咁就弊家伙喇，出嚟个名系我㗎㖞！佢又唔识话俾你听系乜嘢，又永远唔会话俾你听要乜嘢。攞啲榜样嚟听下都好吖，但佢就系要你估，真系好艰难……佢系老板就佢话事。”
有时Ban多几次都系好事嚟嘅
虽然徐克Ban桥令LoLo头都大埋，不过有时Ban桥也未必完全是坏事，《凭着爱》一曲就是最好的例子。
LoLo说：“咁先激发到我挑战自己，超越自己嘅心。《群龙戏凤》嘅主题曲《凭着爱》，我作咗第一个draft，个副导演觉得头𠮶part几好，但系chorus拍唔住，来来去去我都唔知改咗几多次！不过冇所谓，我一定要改，一定要克服到，你话唔合格我就一定要整到你都话合格为止！我要多谢佢，冇佢咁样逼我呢，就去唔到大家听到，攞咗奖嘅呢个版本。”
“任何压力，任何人话未够好，咁你咪当系一种挑战啰，咁先可以挑战自己！”
疯狂点子成就配乐大师
LoLo曾为不少经典电影做配乐，《赌神》、《监狱风云》、《喋血双雄》、《秋天的童话》等等都出自他手笔，但最初是甚么契机让他“踩过界”？要追溯到1986年的电影《1/2段情》。
当年LoLo从未写过电影配乐，只为《1/2段情》创作主题曲《快乐老实人》，但导演陈国熹却邀请他负责配乐部份。至今回想起，LoLo也觉得有点莫名启妙：“佢见我作咗主题曲就叫我做埋配乐，我话我唔识㗎㖞！真系唔知点解佢咁有信心啦，哈哈！”
大家先听以下呢段配乐，再睇埋LoLo解释当中奥妙！
既然机会来得莫名其妙，LoLo就用疯狂的方法应付，亦因此赢得其他导演的垂青，写下过百出电影的配乐。
电影开首的画面，飞机缓缓降落在启德机场，LoLo提着结他步出机场，一个简单的场口却有一段“估你唔到”的配乐。LoLo描述：“我结他用DADGAD Tuning，将第6条线扭到松晒，‘哒哒声’唔啱音嘅，其他线就正常。之后一路弹一路tune番啱第6条线，到啱音𠮶下，最后一个chord，个飞机就停喇！呢个就系令到香港啲人唔揾我做配乐唔得呀！所以做咗百几套出嚟！哈哈！”
LoLo一讲音乐就滔滔不绝，要分享嘅故事点止咁少，大家记得留意另外两篇报道喇！
【专访】神曲《一生所爱》仲有得改 卢冠廷：再做流嘢对自己唔住
【专访】卢冠廷“开班授徙”话你知：电影配乐深奥过流行曲好多！