【独自音乐】钟舒祺台湾出道受冷待：负责人话得闲寄罐头畀我
当你见到钟舒祺（Sukie）的名字，可能你会想起她的打扮有个性、很浮夸、古灵精怪。又会想起她是歌手钟舒漫的妹妹，偶尔会与家姐一起出歌。但未必有人会把她与职业歌手联想在一起。其实钟舒祺是一位歌手，由选秀节目出身，在节目中赢得500万人民币及一纸歌手约。她在台湾出道，曾获华语天后孙燕姿为她监制歌曲。虽然她做的音乐未必好多人接触过，但她坚信只要无悔，就算无人认识也没所谓。歌手钟舒祺于今集的《独自音乐》中唱出自已的作品《免责条款》及翻唱Lady Gaga的《Million Reasons》。她能不能成为你心目中的歌手，由你定夺！摄影：江智骞
钟舒祺（Sukie）向来给人感觉“癫癫丧丧”，说话时大大声，笑的时候更是如入无人之境。她不时与家姐钟舒漫（Sherman）拍搞笑片放上网，究竟她是位KOL、YouTuber、还是一位“艺人”呢？如果你问她，她会肯定地告诉你她是一位歌手：“其实我当初唱歌系一件好白撞嘅事。初初喺美国读书嘅时候并唔系打算读声乐，而系想读音乐后制，但因为无位所以变咗读声乐。读紧嘅过程先知道原来唱歌唔系叫出嚟就系唱歌，而系要好好利用身体唔同嘅部位。”
当她在美国完成音乐学位时，Sukie竟然去了一个她从没有去过的地方追逐她的音乐梦，那个地方并不是香港，而是台湾：“读完书之后认识咗陈珊妮经理人，当时佢问我你咁有自信，要唔要过台湾参加《超级偶像（第三届）》？就系因为咁我就决定去台湾开始足足八个月嘅比赛，当时我以第9名毕业。完咗比赛后我经历三个月无嘢做嘅低潮期。之后就参加内地另一个选秀节目叫做《咪咕明星学院》。我记得呢个比赛系由某大型电讯公司主办，都算系内地初代嘅歌唱选秀节目。不过呢个节目比我想像中复杂。除咗我，入面嘅参赛者全部都已经签哂唱片公司，呢个比赛已经唔系选手与选手之间嘅比赛，而系唱片公司与唱片公司之间嘅斗争。而我就只有赢咗先会有公司签我。结果我赢咗5百万人民币奖金。当然𠮶5百万入咗落签我𠮶间公司到。而我有分到20几万，但七除八扣后，最后收咗７万几蚊。”
Sukie补充：“除了成为歌手，当年嘅唱片公司仲两个月内帮我推出咗我第一张国语大碟《不一样》。不过当时好奇怪，每次出活动做宣传只可以唱cover歌而唔系自己歌。因为我当时个老板系一个生意人，所有嘢佢都只系睇数字，佢认为做音乐系唔需要出钱，所以唱片监制一直未收到钱，我一直又无MMO所以无得唱。结果公司过咗好耐先找数。其实我都几矛盾，我唔可以话自己唔幸运，我可以出碟，但我嘅待遇真系同其他歌手唔同。我只可以讲世界现实，如果我皮肤白净，有身型有外貌可能真系可以唔同啲。”
钟舒祺在台湾出道的日子，虽然曾因找数问题未能以自己的歌曲为自己新碟宣传，更因公司投放的资源不足而化妆整头服装自己包办，不过那段时间她却认识了不少伯乐及知己：“其实我好多谢旧公司同事，因为佢咃在公在私都帮咗我好多，又帮我手剪片。呢啲感情真系用钱都买唔到。”
虽然经过这段不顺利的时间，但她的公司经历人事变动，却大大影响了她在台湾发展：“公司改组，揾咗一批新同事帮手，当时新嘅负责人系做金融嘅。其实佢做开金融又点会真系识做音乐。当时佢同我倾前路问题，又话初头以为我系有钱囡发明星梦，接著又话我哋唔会再帮你，呢份合约如果你唔想解约唔紧要，但我哋（公司）唔会再帮你，你可以自己出去试下。之后佢交咗份合约俾我，我走出咗佢office，佢仲喺我面前同会计讲‘得闲寄罐头同钱畀我’我跟住就同佢讲唔驶啦，That’s not what I need。我就攞住份合约一路喊一路走。”
“虽然我喊住离开呢间唱片公司，但我最开心系识到王心凌嘅经理人。佢当时帮过我好多，除咗用尽人情卡帮我揾机会，又安排我拍摄《还珠格格》又帮我揾到孙燕姿帮我做歌曲《嚣张》嘅监制。仲记得当时为咗做呢首歌，飞去新加坡揾燕姿。佢爸爸妈妈都对我好好。点知录完呢首歌估唔到有阻滞，就系因为人事变动，佢哋话因为似孙燕姿嘅作品所以唔俾推出。孙燕姿系电话到鼓励我要拎番首歌，结果我用咗5年时间佢哋先俾番我，直到上年《嚣张》先推出到。”Sukie说。
钟舒祺唱出自已的作品《免责条款》，并由结他手To Lee为她伴奏。歌曲内容都是以她的经历出发。（点撃以下短片）
后来Sukie回港发展后一直自己专注做音乐，以她姐姐钟舒漫在香港人脉，应该不愁没有签约唱片公司的渠道。不过Sukie似乎暂时未有这个打算：“返香港后同家姐合唱了《SS14》，成绩算不错。之后开始做自己音乐，所有嘢都系真金白银自己出钱。自己暂时未有打算签其他公司，钟意做自己钟意嘅音乐，我连自己MV都会坐系到睇住导演剪。呢两年我做过几首呕心沥血嘅作品，虽然并唔系好多人听过，但我唔介意。我觉得质素系跟住自己一世，所以我觉得无悔。”
Sukie续说：“虽然暂时音乐上靠自己，但系好兴幸之前因为拍电视台节目《今晚睇李》而识到一班Palwerful Band 成员。Palwerful Band之前又做过好多大大小小嘅骚，豹哥（单立文）又好照顾我哋，虽然佢好忙，但任何Palwerful Band成员生日佢都一定唔会错过！”